NASA qyzmetkerleriniń sany 20%-ǵa qysqarady

ASTANA. KAZINFORM – AQSh-tyń Ulttyq aeronavtıka jáne ǵarysh keńistigin zertteý basqarmasynyń (NASA) shtattyq quramy 20 paıyzǵa qysqarady. Bul týraly agenttiktiń baspasóz hatshysy Sherıl Ýorner málim etti.

NASA taratqan resmı habarlamada 3 870 qyzmetker jumystan óz erkimen ketýge kelisim bergeni kórsetilgen. Osylaısha, agenttikte shamamen 14 myń adam qalady. Bul san aldaǵy aptalarda qaıta qaralýy múmkin.

Qysqartý Donald Tramp ákimshiligi usynǵan «keıinge shegerilgen jumystan bosatý» (Deferred Resignation Program – DRP) baǵdarlamasy aıasynda júzege asýda. Birinshi kezeńde 870 adam, al ekinshi kezeńde taǵy 3 000-ǵa jýyq qyzmetker jumystan ketý týraly ótinish bergen.

Odan bólek, 500 qyzmetker erikti túrde zeınetke shyǵý jáne basqa da jeńildik baǵdarlamalary arqyly jumystan bosatylǵan.

NASA basshylyǵy bul qadam agenttiktiń tıimdiligin arttyryp, Aı men Marsqa ushýdy qamtıtyn «Altyn ǵasyr» baǵdarlamalaryn jalǵastyrýǵa múmkindik beredi dep otyr.

Alaıda agenttik ishinen qarsylyq týyndaýda. Ótken aptada burynǵy jáne qazirgi 362 qyzmetker, onyń ishinde ǵalymdar, «Voıadjer deklaratsııasy» atty ashyq hat jarııalap, bıýdjet qysqartýlaryna, granttardyń toqtatylýyna jáne uıym ishindegi «únsizdik mádenıetine» alańdaýshylyq bildirdi.

Aıta keteıik, Tramptyń 2026 jylǵy federaldy bıýdjet jobasynda NASA-nyń ǵylymı baǵytyna bólinetin qarjy eki esege qysqaryp, jalpy qarjylandyrý kólemi 24%-ǵa azaıtylǵan.

Eske salaıyq, AQSh-tyń Kólik mınıstri NASA-ny ýaqytsha basqaratyn boldy.