NASA ǵaryshkerleri SpaceX-tegi aqaýǵa baılanysty úılerine qaıta almaı otyr

ASTANA. KAZINFORM – Barrı Ýılmor men Sýnı Ýılıams Halyqaralyq ǵarysh stansasynda (HǴS) bir apta bolýdy josparlaǵan, biraq ǵarysh kemesindegi aqaýlarǵa baılanysty olardyń ǵaryshta bolǵanyna toǵyz aı boldy.

Eki astronavt HǴS-qa Boeing kompanııasynyń Starliner ǵarysh kemesiniń basqarylatyn alǵashqy synaq ushýy aıasynda ótken jyldyń maýsym aıynda keldi, biraq kemedegi aqaýlar olardy orbıtada qalýǵa májbúr etti, dep habarlaıdy Fox News. 

SpaceX pen NASA kompanııalary sársenbide zymyrandy ushyrý alańyna bekitetin qysqysh tutqalardyń birindegi aqaýǵa baılanysty Crew-10 zymyranyn HǴS-qa josparlanǵan ushyrýdan bas tartty. 

Zymyrandy ǵaryshqa ushyrýdyń kelesi múmkindigi beısenbi kúni bolady.

Falcon 9 zymyrany HǴS-qa alty aılyq mıssııa úshin tórt adamnan turatyn ekıpajdy: NASA astronavtary Enn Makkleın men Nıkol Aıers, japondyq astronavt Takýıa Onısı jáne reseılik ǵaryshker Kırıll Peskovty alyp ketedi dep kútilip otyr.

Qazirgi ýaqytta HǴS-ta qalyp otyrǵan Ýılmor men Ýılıams, sondaı-aq HǴS ekıpajynyń basqa eki múshesi, NASA astronavty Nık Heıg pen reseılik ǵaryshker Aleksandr Gorbýnov úılerine ǵarysh stantsııasyna ótken jyldyń qyrkúıeginde jetken SpaceX Dragon kapsýlasymen barady, dep habarlaıdy NBC News. 

Jaqynda AQSh prezıdenti Donald Tramp Ilon Maskke astronavtardy úılerine qaıtarýdy tapsyrǵan bolatyn.

Ýılmor men Ýılıamsty ótken jyldyń maýsymynda HǴS-qa jetkizgen Boeing kompanııasynyń Starliner ǵarysh kemesi 2024 jyldyń qyrkúıeginde HǴS-pen túıisken kezde «gelııdiń kemýine» jáne «basqarý qozǵaltqyshtarynyń aqaýlaryna» baılanysty Jerge ekıpajsyz oraldy.

Buǵan deıin NASA ǵaryshkeri HǴS-tan oralǵannan keıin cyrqattanyp qalyp, aýrýhanaǵa túskenin jazdyq.