NASA ǵaryshkeri HǴS-tan oralǵannan keıin cyrqattanyp qalyp, aýrýhanaǵa tústi

ASTANA. KAZINFORM – Quramynda reseılik ǵaryshker Aleksandr Grebenkın bar «Crew-8» mıssııasy aıasynda Jerge oralǵan AQSh Ulttyq aeronavtıka jáne ǵarysh keńistigin zertteý basqarmasynyń (NASA) astronavty naýqastanyp aýrýhanaǵa jatqyzyldy, dep habarlaıdy TASS aqparat agenttigi. https://tass.ru/proisshestviya/22234705

Amerıkalyq ǵarysh vedomstvosy saıtynyń habarlaýynsha, juma kúni Florıda jaǵalaýynda Atlant muhıty sýyna qonǵannan keıin «NASA astronavty ózin nashar sezingen». Ekıpajdyń barlyq tórt múshesi, sonyń ishinde reseılik ǵaryshker Pensakola qalasynyń (Florıda) aýrýhanasyna jetkizildi. 

Medıtsınalyq tekserýden keıin ekıpajdyń úsh múshesi, onyń ishinde Grebenkın Pensakoladan shyǵyp, Hıýstondaǵy (Tehas) Djonson ǵaryshtyq ushý ortalyǵyna jetkizildi.

Habarlanǵandaı, aýrýhanaǵa jatqyzylǵan NASA astronavty (esimi atalmaǵan) dárigerlerdiń baqylaýynda, onyń jaǵdaıy turaqty. Bul sharalar «saqtyq maqsatynda» qabyldandy, dep atap ótti ǵarysh vedomstvosynan. NASA TASS-tyń aýrýhanaǵa jatqyzylǵan adamnyń densaýlyǵy týraly habarlaý, sondaı-aq ekıpajdyń basqa múshelerin, sonyń ishinde reseılik ǵaryshkerdi medıtsınalyq tekserý nátıjelerin habarlaý týraly ótinishine ázirge jaýap bergen joq.

Amerıkalyq SpaceX kompanııasynyń Crew Dragon ǵarysh kemesi Crew-8 mıssııasynyń ekıpajymen birge 25 qazanda AQSh-tyń shyǵys jaǵalaýy ýaqytymen 03:29-da (Máskeý ýaqytymen 10:29) Jerge oraldy. Grebenkınnen basqa, orbıtalyq stantsııada 2024 jyldyń naýryz aıynan bastap ornalasqan Crew-8 mıssııasynyń ekıpajynda NASA astronavttary Mettıý Domınık, Maıkl Barratt jáne Djanett Epps boldy.

Crew Dragon Halyqaralyq ǵarysh stantsııasynan (HǴS) 23 qazanda AQSh-tyń shyǵys jaǵalaýy ýaqytymen saǵat 17:05-te (Máskeý ýaqytymen 24 qazan 00:05-de) ajyrady. Ol 8 qazanda ótýi kerek edi, alaıda aýa raıynyń qolaısyzdyǵyna baılanysty birneshe ret keıinge shegerildi.

Kazinform úshin arnaıy TASS seriktes agenttigi usynǵan.