NASA Crew-11 ekıpajyn Jerge erterek qaıtarýdy uıǵardy

ASTANA. KAZINFORM — AQSh ulttyq aeronavtıka jáne ǵarysh basqarmasy (NASA) astronavttardyń biriniń densaýlyǵyna baılanysty Halyqaralyq ǵarysh stantsııasynan Crew-11 ekıpajynyń merziminen buryn oralatynyn málimdedi, dep habarlaıdy TASS.

NASA ákimshisi Djared Aızekmannyń aıtýynsha, HǴS ekıpajy Crew-11 mıssııasyndaǵy áriptesine tikeleı orbıtada dıagnoz qoıýǵa jáne medıtsınalyq kómek kórsetýge múmkindigi joq.

— Buryn atap ótkenimizdeı, bul aýyr medıtsınalyq jaǵdaı boldy. Sondyqtan Crew-11 ekıpajynyń Jerge erterek oralý joly tańdaldy. Men ǵaryshkerlerimizdiń múddesi úshin olardy josparlanǵan merzimnen buryn Jerge qaıtarý kerek dep sheshtim, — dedi Aızekman naqty kúni áli jarııalanbaǵanymen ekıpajdyń jaqyn kúnderi oralatynyn atap ótip.

NASA Medıtsınalyq máseleler jónindegi basshysy Djeıms Polk erte oralý tótenshe jaǵdaıdaǵy evakýatsııa emes ekenin jetkizdi.

— Ǵaryshkerdiń jaǵdaıy turaqty, sondyqtan biz orbıtadan tótenshe túsý nemese ondaǵy qıyn jaǵdaı týraly aıtyp otyrǵan joqpyz, — dedi ol.

Polk agenttik áli ǵaryshkerdiń jeke basyn nemese onyń densaýlyǵy týraly málimetterdi jarııa etpeıtinin aıtty.

Crew-11 ekıpajynda amerıkalyq astronavtar Zena Kardman men Maık Fınk, japon astronavty Kımııa ıÝı jáne reseılik ǵaryshker Oleg Platonov bar. Fınk pen Kardman beısenbi kúni stantsııanyń syrtynda jabdyqty ornatý úshin 6,5 saǵattyq ǵaryshtyq saıahat jasaýy kerek edi. Ǵaryshkerler Halyqaralyq ǵarysh stantsııasyna tamyz aıynda jetken, olar mamyr aıynda jerge oralady dep josparlanǵan bolatyn.

Aıta keteıik, 2036 jylǵa qaraı «Roskosmos» aıda elektr stantsııasyn salýdy josparlap otyr.

Al Qazaqstan «KazSat-3R» ǵaryshtyq baılanys júıesin qurýǵa konkýrs jarııalady.