NASA bolashaq Marsty ıgerýshilerdiń esimderin atady
ASTANA. 19 maýsym. QazAqparat - Amerıkandyq NASA ǵarysh agenttigi 2020 jyly Marsqa attanatyndardyń esimderin atady, dep habarlady Ýtro.rý.
Astronavtardyń jartysy áıelder bolyp otyr. Úmitkerler 6,1 myń adamnyń ishinen qatań irikteýden ótti. Olardyń bilimi men daıarlyq deńgeıin mamandar bir jarym jyl boıy tekserdi.
«Biz akademııalyq deńgeıi, dene shymyrlyǵy jáne psıhologııalyq daıarlyǵy jaǵynan jaqsy nátıje kórsetken segiz adamdy iriktep aldyq», - delingen NASA-nyń málimdemesinde. «Olardyń árqaısysynyń baı ómirlik tájirıbesi, bilimi bar jáne arnaıy daǵdylardy meńgergen. Olar bir-birine bilimderin úıretip, NASA zertteýlerine zor úles qosa alady», - dedi Djonson atyndaǵy ǵarysh agenttiginiń ókili Djanet Kavandı.
Olardyń arasyndaǵy 39 jastaǵy Djosh Kassada ushqysh, bilimi boıynsha fızık, 37 jastaǵy Vıktor Glover men Nık Heıg synaýshy-ushqysh, 34 jastaǵy Krıstına Hamok muhıttaný salasyndaǵy zertteýlermen aınalysady, 34 jastaǵy Enn Makkeın áskerı qyzmetshi, jaqynda synaýshy-ushqysh mektebinde daıarlyqtan ótti. 35 jastaǵy Nıkol Mann teńiz jaıaý áskerinde qyzmet atqarǵan. Marsqa attanýshylardyń arasynda eki dáriger bar: 35 jastaǵy Djessıka Meır Garvard ýnıversıteti janyndaǵy mektepte anestezıolog, 37 jastaǵy Endrıý Morgan áskerı qyzmetshi jáne medıtsına ǵylymdarynyń doktory, tótenshe jaǵdaılar rejıminde jumys jasap ysylǵan adam.
Astronavtar tamyz aıynda Hıýstondaǵy jattyǵý ortalyǵynda daıarlyqtan ótedi. Qazirgi jaǵdaıda Marska ushý shamamen 360 kúnge sozylady.
Marsqa ushý ǵaryshkerler úshin óte qaýipti. Ondaǵy radıatsııa sáýlesi ólimge aparyp soqtyratyn qaterli isik aýrýyna shaldyqtyrýy múmkin. Ǵalamshar betindegi radıatsııa degeıi Curiosity marsohodynyń bort kompıýterin isten shyǵara alady.
