NASA bıyl Aıǵa úsh pılotsyz mıssııa josparlap otyr
ASTANA. KAZINFORM – NASA bıyl Aıǵa úsh pılotsyz mıssııany iske qosý josparyn jarııalady. Bul turaqty aı bazasy qurylysynyń alǵashqy qadamdary bolady, dep habarlaıdy NBC News.
Mıssııalar robottar kómegimen júzege asyrylady. Ǵarysh agenttigi Aıdyń ońtústik polıýsindegi oryndardy zertteýdi, ǵylymı derekterdi jınaýdy, tehnologııalardy synaqtan ótkizýdi jáne ǵaryshkerlerdiń Aı betine oralýyna daıyndalýdy josparlap otyr.
Birinshi mıssııa – «Moon Base 1» («Aı bazasy 1») Aıǵa qonýdyń jeke qarjylandyrylǵan alǵashqy mıssııasy. Djeff Bezos negizin qalaǵan Blue Origin kompanııasy bul mıssııada mańyzdy ról atqarady dep josparlap otyr. NASA kompanııamen Aıǵa qoný modýliniń kómegimen eki ǵylymı jáne tehnologııalyq júk jetkizý kelisimshartyn ornatty.
«Moon Base 2» mıssııasynyń bóligi retinde Pensılvanııadaǵy Astrobotic kompanııasy qurastyrǵan qoný modýli Aı betine 450 kg-nan astam júk pen aı betinde júrýshini jetkizedi.
«Moon Base 3» mıssııasy ǵylymı sıpatta bolady. Joba aıasynda «aı quıyndaryn» zertteý josparlanyp otyr. Sondaı-aq Eýropalyq ǵarysh agenttigi men Ońtústik Koreıa ǵarysh agenttiginen júkter jetkiziledi.
NASA-nyń Aı bazasy baǵdarlamasynyń menedjeri Karlos Garsııa-Galannyń habarlaýynsha, bıylǵy úsh ushyrylymnyń barlyǵy NASA-nyń 2029 jylǵa deıin sozylatyn jáne Aıǵa 25 ushyrý men 21 ekıpajsyz qonýdy qamtıtyn, 4 tonna júk jetkizetin Aı bazasyn qurýdyń uzaq merzimdi josparynyń birinshi kezeńiniń bóligi.
Ekinshi kezeńde, 2029-2032 jyldary NASA Aıda bolashaqta spýtnık qonystandyrýǵa múmkindik beretin jartylaı turaqty qurylymdar salýdy josparlap otyr.
2032 jyly bastalatyn úshinshi kezeńde agenttik Aı betinde turaqty aýysyp otyratyn adamdardyń bolýyn qamtamasyz etpek. Al Jer spýtnıginde úzdiksiz qyzmet júrgiziledi.
Seısenbi, 26 mamyrda NASA Kalıfornııadaǵy Astrolab jáne Koloradodaǵy Lunar Outpost jeke aeroǵarysh kompanııalaryna avtonomdy túrde jumys isteı alatyn jáne aqyry ǵaryshkerler Aı betinde paıdalana alatyn aı betinde júrýshilerdi jasaý úshin 220 mln dollar grant bólgenin jarııalady.
Budan basqa, shtab-páteri Tehasta ornalasqan Firefly Aerospace kompanııasy Aıdyń ońtústik polıýsinde qyzyqty erekshelikterdi zertteý úshin tórt dron jasaýǵa 75 mln dollarlyq kelisimshartty utty.
Osyǵan deıin «Artemıda-2» mıssııasymen Aıǵa ketken astronavtar Jerge oralǵanyn jazdyq.
Qasym-Jomart Toqaev Donald Trampty «Artemıda-2» mıssııasynyń tabysty oryndalýymen quttyqtady.
