NASA Aıǵa júk jetkizý baǵdarlamasyna qatysatyn segiz kompanııany tańdady

ASTANA. KAZINFORM – NASA Aıdy zertteý jáne onda ınfraqurylym qalyptastyrý jumystaryn keńeıtýge baǵyttalǵan jańa bastamalaryn tanystyrdy. Sonyń biri – Aıǵa júk jetkizý mıssııalaryna qatysatyn segiz kompanııany irikteý, dep habarlaıdy «Sınhýa» agenttigi.

NASA Aıǵa júk jetkizý baǵdarlamasyna qatysatyn segiz kompanııany tańdady
Foto: pixabay.com

Tańdalǵan segiz kompanııanyń qatarynda Blue Origin, Firefly Aerospace, Intuitive Machines, iSpace US, Lockheed Martin, Northrop Grumman, SpaceX jáne Voyager Technologies bar.

NASA bul týraly Florıda shtatyndaǵy Kennedı ǵarysh ortalyǵynda ótken MAX POWER aeroǵarysh kórmesi men avıashoý barysynda málimdedi.

Commercial Lunar Payload Services 2 (CLPS 2) dep atalatyn jańa baǵdarlama aıasynda kompanııalar Aıǵa júk jetkizý qyzmetin kórsetedi. Olar NASA-nyń ǵylymı zertteýlerge, tehnologııalyq ázirlemelerge jáne ınfraqurylymǵa arnalǵan júkterin Aıǵa tasymaldaıtyn qoný apparattaryn basqarý, qurastyrý jáne paıdalanýmen aınalysady.

NASA sonymen qatar ıadrolyq energııamen jumys isteıtin Polar Rover for Observation, Mapping, and In-Situ Exploration atty Aı roverın ázirleý jumystaryn jalǵastyratynyn habarlady.

Alty dońǵalaqty rover Aıdyń ońtústik polıýsine qonyp, onyń betki qabaty men jer qoınaýyn zertteıdi. Sondaı-aq tabıǵı resýrstardyń áleýetin baǵalap, bolashaqta qoný alańdaryn tańdaý, ınfraqurylymdy damytý jáne zertteý jumystaryn josparlaý úshin qajetti derekter jınaıdy.

NASA málimetinshe, ıadrolyq qýatpen júretin rover Aıdaǵy uzaq túnderde jáne únemi kóleńkede bolatyn aımaqtarda da jumys isteı alady. Ǵalymdar mundaı jerlerde muz qory bolýy múmkin dep esepteıdi. Bul múmkindik Aıda adamnyń uzaq ýaqyt boıy turaqty bolýyn qamtamasyz etý úshin asa mańyzdy sanalady.

Aı betindegi ınfraqurylymnyń múmkindikterin keńeıtý maqsatynda NASA shaǵyn baılanys jáne kún energııasy munarasyna arnalǵan kommertsııalyq komponentterdi satyp alýdy josparlap otyr. Olardyń qatarynda kún panelderi, akkýmýlıatorlar jáne symsyz energııa berý jabdyqtary bar.

Aıta keteıik, buǵan deıin NASA-nyń Swift ǵarysh observatorııasy ǵaryshta 20 jyl bolǵannan keıin Jerge qulaǵanyn habarlaǵan edi. 

Al oǵan deıin atalǵan ǵarysh observatorııasyn qutqarý operatsııasy aıasynda NASA orbıtaǵa alǵashqy robotyn ushyrǵan edi.

Sondaı-aq NASA Marsta sýdyń birneshe ret bolǵanyn dáleldeıtin belgiler tabylǵanyn málimdedi.