NASA Aıǵa jiberiletin ǵaryshkerler quramyn jasaqtaıdy
ASTANA. KAZINFORM — NASA ǵaryshkerler qataryna qabyldaý jarııalap, AQSh azamattaryn 3 jeltoqsanǵa deıin ótinim berýge shaqyrdy. Іrikteýden ótkender Aıda ómir súrip, jumys isteý múmkindigine ıe bolady, dep habarlaıdy Kazinform agenttiginiń menshikti tilshisi CBS News-ke silteme jasap.
Úmitkerler joǵary bilimmen qatar, tıisti kásibı tájirıbege ıe bolýǵa tıis. Іrikteýden ótkender Hıýston qalasyna kóship, Lındon Djonson atyndaǵy ǵarysh ortalyǵynda qyzmet etedi. Jyldyq eńbekaqysy – 164 395 dollar.
– Biz tańdaǵan mamandar Aı betinde erkin júrip, Aı bazasynda turyp, jumys isteıdi. Buǵan qosa bolashaqta ekıpajdy Marsqa jiberýge múmkindik beretin júıeler men operatsııalardy ázirleýge atsalysady, – dedi NASA ákimshisi Djared Aızekman.
Úmitkerler tómendegi tórt bilim berý baǵytynyń birine sáıkes kelýge tıis:
1. Injenerııa, bıologııa, fızıka, ınformatıka nemese matematıka salalarynyń biri boıynsha magıstr dárejesi.
2. Osy mamandyqtardyń biri boıynsha doktorantýrada keminde eki jyl oqý.
3. Medıtsına salasyndaǵy tıisti biliktilik: medıtsına doktory, dáriger kómekshisi nemese tájirıbeli medbıke dıplomy.
4. 2027 jylǵy shildege deıin synaqshy ushqyshtar mektebin aıaqtaý.
Buǵan qosa NASA úmitkerlerdiń oqýyn aıaqtaǵannan keıin belgili bir kásibı tájirıbesi bolýyn talap etedi.
Ushqyshtar tómendegi úsh talaptyń birine saı bolýǵa tıis:
- joǵary ónimdi reaktıvti ushaqty basqarǵan ushqysh retinde keminde 750 saǵat ushý;
- basqa ushaqtarmen 1 500 saǵat ushý, onyń ishinde 750 saǵaty áýe kemesiniń komandıri retinde bolýy;
- tikushaq jáne basqa da rotorly áýe kemelerimen 1 000 saǵat ushý, onyń 300 saǵaty áýe kemesiniń komandıri retinde ótýi kerek. Bastapqy ushý daıarlyǵy men dronmen ushý ýaqyty esepke alynbaıdy.
Ushý synaqtary: úmitkerler 2027 jylǵy shildege deıin synaqshy ushqyshtar mektebin bitirýi nemese oǵan oqýǵa túsýi jáne osy baǵytta keminde úsh jyl jumys tájirıbesi bolýy kerek.
Medıtsına: medıtsınalyq bilim alǵannan keıin mamandyǵy boıynsha keminde úsh jyl eńbek ótili bolýǵa tıis. NASA málimetinshe, rezıdentýrada oqý merzimi de eńbek ótiline esepteledi.
Jaratylystaný ǵylymdary: bıologııa jáne medıtsına salasynyń mamandary óz baǵyty boıynsha keminde úsh jyl jumys tájirıbesine ıe bolýy kerek.
Fızıka jáne matematıka: mamandyǵy boıynsha keminde úsh jyl eńbek ótili bolýǵa tıis.
Injenerııa: mamandyǵy boıynsha keminde úsh jyl jumys tájirıbesi talap etiledi.
Qosymsha talap: adam ómiri men mıssııa qaýipsizdigine qater tónetin kúrdeli jaǵdaıda jedel sheshim qabyldap, komandamen jumys isteý boıynsha keminde úsh jyl tájirıbesi bolýǵa tıis.
Sondaı-aq úmitkerler medıtsınalyq jáne psıhıatrııalyq tekserýden ótip, kórý qabiletin teksertýi, ómirbaıandyq derekterin rastaýy jáne esirtkige test tapsyrýy kerek.
Bolashaq astronavtar aýyr dene jattyǵýlaryn oryndaýǵa, sonyń ishinde aýyr zat kóterýge, otyryp-turýǵa, eńbekteýge jáne qolaısyz aýa raıyna tótep berýge daıyn bolýy qajet. Budan bólek olar ómirine qaýip tónetin jaǵdaıda jumys isteýge, shalǵaı ári oqshaý jerde, tar nemese jabyq keńistikte uzaq ýaqyt turyp, eńbek etýge ázir bolýǵa tıis. Buǵan qosa úmitkerler júzý synaǵynan ótedi.
Sonymen qatar úmitkerler ǵaryshta 12 aı nemese odan da uzaq ýaqyt bolýǵa, tolyq oqshaýlanýǵa, turmystyń aýyr jaǵdaıyna jáne jaqyndarynan uzaq ýaqyt qol úzýge daıyn bolýy kerek.
Buǵan deıin NASA-nyń 4 ǵaryshkeri «Marstaǵy bazada» 1 jyl turǵany habarlanǵan bolatyn.
