NASA Aıǵa baǵyttalǵan «Artemıda II» mıssııasynyń ushyrylýyn keıinge qaldyrdy
ASTANA. KAZINFORM – NASA Aıǵa baǵyttalǵan alǵashqy pılottyq mıssııasyn sońǵy jarty ǵasyrdan astam ýaqyttan keıin júzege asyrýdy keıinge qaldyrdy. Ǵarysh agenttigi «Artemıda II» mıssııasyn naýryz aıynda ushyrýdy josparlap otyr. Bul sapar barysynda tórt ǵaryshker «Apollon» baǵdarlamasy aıaqtalǵannan beri alǵash ret tereń ǵaryshqa attanady, dep habarlaıdy Kazinform.
Sheshim seısenbi kúni tańerteń NASA ǵaryshkerlerdi Aıdyń aınalasynda buryn-sońdy bolmaǵan ushýǵa jiberetin alyp zymyran júıesiniń eń mańyzdy synaǵy – sý qoldaný arqyly bas daıyndyqtyń aıaqtalǵanyn jarııalaǵannan keıin qabyldandy. Mıssııa 8 aqpanda ushyrylady dep kútilgenin jazdy CNN.
Alaıda agenttik synaq kezinde salqyn kún raıynan bolǵan keshigýge baılanysty týyndaǵan birqatar másele, sonyń ishinde Artemis II zymyran-tasyǵyshyna janarmaı quıý kezinde sýteginiń kemýi týraly habarlady. Agenttik málimdemesinde keshigý komandalarǵa derekterdi taldaýǵa jáne ekinshi ushyrý jattyǵýyn ótkizýge múmkindik beretini aıtylǵan.
- SLS ushyrylymdary arasynda úsh jyldan astam ýaqyt ótkenin eskere otyryp biz qıyndyqtarǵa tap bolatynymyzdy kúttik. Sondyqtan joǵary ylǵaldylyq jaǵdaıynda bas daıarlyqty júrgizip jatyrmyz. Bul synaqtar ushý aldyndaǵy máselelerdi anyqtaýǵa jáne start kúni sáttiliktiń eń joǵary yqtımaldyǵymen ushyrýdy qamtamasyz etýge arnalǵan, - dep málimdedi NASA ǵarysh agenttiginiń basshysy Djared Aızekman.
Ushýǵa ruqsat alǵannan keıin, «Artemıda II» mıssııasy tórt ǵaryshker – NASA-dan Rıd Ýaızman, Vıktor Glover, Krıstına Koh jáne Kanada ǵarysh agenttiginen Djeremı Hansendi Aıdyń arǵy betinen 10 kúndik saıahatqa jiberedi. Bul mıssııa adamzat Jerden eń uzaq qashyqtyqqa ushý boıynsha jańa rekord ornatýy múmkin.
Astronavttar endi karantınnen bosatylady, al jańa karantınge josparlanǵan ushyrylym kúninen shamamen eki apta buryn oralady.
NASA buǵan deıin ushyrylym úshin qoljetimdi kúnder týraly málimdegen, ol 6, 7, 8, 9 jáne 11 naýryz.
Osyǵan deıin GRU Space startapy 2032 jylǵa qaraı Aı betinde alǵashqy qonaqúı keshenin iske qosýdy kózdep otyrǵanyn jazdyq.