NASA Aı betinde adam turatyn aýyl salmaqshy

ASTANA. KAZINFORM — Amerıkalyq ǵarysh agenttigi NASA 2035 jylǵa qaraı Aıda adamdar tura alatyn aýyl salýdy josparlap otyr, dep habarlaıdy AZERTADJ.

Bul týraly agenttiktiń basshysy mindetin ýaqytsha atqarýshy Shon Daffı Sıdneıde ótken Halyqaralyq astronavtıka kongresinde málimdedi, dep jazady Daily Mail.

Onyń aıtýynsha, aldaǵy onjyldyqta NASA Aıda tek stantsııa emes, adamdar ómir súre alatyn tolyqqandy aýyl salǵysy keledi. Daffı Aıda turaqty ómir súrýge qajetti barlyq jaǵdaı jasalatynyn atap ótti.

2026 jyldyń aqpanynda NASA «Artemıda-II» mıssııasyn iske qosýdy josparlap otyr. Sonyń aıasynda tórt astronavt Aıǵa attanbaq. Bul – sońǵy 50 jyl ishindegi alǵashqy ushý bolmaq. Degenmen bul mıssııa aıasynda Aıǵa qoný josparlanbaǵan.

NASA-nyń basty maqsaty — Aıda adamdarǵa arnalǵan aýyl salý. Bul aýyl ıadrolyq energııamen jumys isteıdi. Ol Aı betindegi materıaldardan salynady jáne astronavtardy uzaq ýaqytqa qabyldaı alatyn bolady.

Shon Daffıdiń aıtýynsha, Aıdaǵy aýyl qurylysy aıaqtalǵan soń, NASA Marsqa qoný baǵytyna belsendi túrde kirisedi.

Budan buryn ǵaryshta toǵyz aı bolǵan NASA astronavttary Býtch Ýılmor men Sýnı Ýılıams úılerine oralǵanyn habarlaǵan edik.