NASA astronavttarǵa ǵaryshqa smartfon alyp ushýǵa ruqsat berdi

ASTANA. KAZINFORM – Naýryz aıynda Aıǵa ushýy tıis «Artemıda II» mıssııasynyń astronavttary ózderimen birge smartfon alyp ushyp, ashyq ǵaryshtan túsirimder jasaı alady. Bul týraly NASA dırektory Djared Aızekman H áleýmettik jelisinde málim etti.

NASA astronavtarǵa ǵarysh mıssııalaryna ózderimen birge smartfon alyp shyǵýǵa resmı túrde ruqsat berdi. Mundaı alǵashqy ushýlar Halyqaralyq ǵarysh stantsııasyna baǵyttalǵan Crew-12 mıssııasy aıasynda júzege aspaq, al keıin bul tájirıbe «Artemıda II» ekspedıtsııasy kezinde de qoldanylady.

Aızekmannyń aıtýynsha, smartfondardy paıdalaný ekıpaj múshelerine óz otbasylary úshin mańyzdy sátterdi hatqa túsirip, foto jáne beınematerıaldardy keń aýdıtorııamen bólisýge múmkindik beredi.

Sonymen qatar bul sheshim tek sımvolıkalyq qadammen shektelmeıdi. Osyǵan baılanysty agenttik burynnan qalyptasqan ishki erejelerdi qaıta qarap, ózgertýge májbúr boldy.

— Biz ornyqqan protsesterdi qaıta oı eleginen ótkizip, zamanaýı qurylǵylardy ǵarysh saparyna jedel tártippen sertıfıkattadyq. Mundaı shapshańdyq NASA úshin paıdaly bolmaq, sebebi biz orbıtada da, Aı betinde de asa qundy ǵylymı zertteýler júrgizip otyrmyz. Bul — durys baǵyttaǵy shaǵyn, biraq mańyzdy qadam, — dep atap ótti ol.

Aıta ketý kerek, smartfondardyń ǵaryshta qoldanylýy alǵash ret bolyp otyrǵan joq. On jyldan astam ýaqyt buryn iPhone 4 ǵaryshqa ushýǵa jaramdy dep tanylyp, STS-135 mıssııasy aıasynda «Atlantıs» shattly arqyly HǴS-qa jetkizilgen edi. Ol kezde astronavtar qurylǵyny gıroskop, akselerometr jáne kamera sekildi kiriktirilgen datchıkterdi paıdalana otyryp, ǵylymı tájirıbeler júrgizý úshin qoldanǵan.

Osyǵan deıin NASA Aıǵa baǵyttalǵan «Artemıda II» mıssııasynyń ushyrylýyn keıinge qaldyrǵany týraly jazdyq.