NASA «Artemis II» mıssııasynyń Aıǵa qatysty 12 myń fotosyn jarııalady
ASTANA. KAZINFORM – NASA «Artemis II» mıssııasy aıaqtalǵannan keıin 12 myńnan astam fotosýretti jarııalady, dep habarlaıdy Kazinform agenttiginiń Vashıngtondaǵy menshikti tilshisi.
«Artemis II» 1 sáýirde ushyrylyp, 6 sáýirde Aıǵa eń jaqyn qashyqtyqqa jetip, 10 sáýirde Jerge oraldy. 10 kúnge sozylǵan mıssııa barysynda NASA astronavttary Rıd Ýaısman, Vıktor Glover jáne Krıstına Koh, sondaı-aq Kanadanyń ǵarysh agenttiginiń astronavty Djeremı Hansen myńdaǵan sýret túsirgen. Ǵarysh agenttigi mıssııa úshin mańyzdy aqparat almasýǵa basymdyq bergendikten, ushý kezinde Jerde tek az ǵana fotosýretter kórsetilgen.
Endi bul sýretterdi alǵash ret kópshilik NASA saıtynan kóre alady. Scientific American málimetinshe, onda qazirgi ýaqytta mıssııaǵa qatysty 12 217 fotosýret ornalastyrylǵan.
Bul sýretterdiń túpkilikti saqtalatyn orny – NASA-nyń Planetarlyq derekter júıesi bolady. Ýaqyt óte kele Aıdy aınalyp ushý kezinde jazylǵan «Artemis II» astronavttarynyń daýys jazbalary da qoljetimdi bolady.
Fotosýretterdiń kómegimen ǵalymdar Aıdyń túsi men jaryqtyǵyn zerttep, onyń geologııalyq tarıhy týraly málimet alady. Sonymen qatar meteoroıdtardyń Aı betimen soqtyǵysýynan paıda bolatyn jarqyldar baqylanyp, bolashaq mıssııalar úshin qonýǵa yqtımal oryndar zerttelip jatyr, sondaı-aq Aıdyń sırek atmosferasy men ondaǵy shań quramyna taldaý jasalyp jatyr.
Eske sala ketsek, naýryzda NASA Aıda baza salý jáne ıadrolyq ǵarysh kemesin ushyrý týraly habarlaǵanyn jazǵanbyz.
Al «Artemis II» mıssııasymen Aıǵa ketken astronavtar 10 sáýirde Jerge oraldy.
