Narynnyń qumynan shyǵyp, osynaý qazaq sııaqty eldi ózine baǵyndyrǵan Farıza armansyz ótti - depýtat O.Asanǵazy
«Ómirden bar qazaqtyń baýyry, qazaq qyzdarynyń apasy, Farıza qyz ótti. Farıza apam ózi jyrlaǵanyndaı, «Áıel tek erlik taǵdyr keshedi, jar salyp, jarııalamaı erlik jasaıdy» deıdi.
«Bıik turǵan bir kúsh bar.
Dıdaryna jer de qushtar, kún qushtar.
Ol - náziktik, máńgi shýaq, nury qut.
Sarqylmaıtyn jylylyq.
Ol - tirliktiń qýaty, Áıel atty ulylyq», - deıdi. Áıel retinde, qyz retinde, ana retinde bar qazaqty baýyrym degen. Qaı jerde, kimniń qınalǵan shaǵy bolsa, ol Qazaqstannyń qaı shetinen bolmasyn, soǵan qol ushyn berip, sony eń bolmasa óziniń sózimen, jyrymen demeý berip júrgen adam. Ásirese, búkil qazaq biledi, Asanbaı Asqarovtyń, Shámshi Kópbaıulynyń bastaryna is túsken kezde qylyshyn qolyna alyp, sol baýyrlaryna bir jan jylýyn berdi. Osynysymen este qaldy. Jalpy Narynnyń qumynan shyǵyp, qazaqtyń bıigine kóterilgen, eshkimge teńdesi joq, ózinshe erekshe, eshkimge uqsamaıtyn minezimen, shynshyldyǵymenen, adaldyǵymenen este qaldy. Ol kisiniń árbir sózine, tipti kez kelgen sóılegen sózinde sol jınalystyń, aıtylatyn sózdiń baryn aqtaryp, shyndyǵyn Farıza aıtatyn», - dep eske alady O.Asanǵazy.
Til janashyry Orazkúl apamyz, suhbat barysynda ótken ómirge kóz tastap, Farıza aqynnyń er minezdi qylyqtarynan da bir úzik áńgimesin aıtyp berdi.
«Meniń esimnen ketpeıdi, Svetlana Jalmaǵambetova qyzyn uzatty Túrkııa azamatyna. Astanada Saltanat saraıynda toıy ótip jatyr. Báıgeldi, Kekilbaev, Joldasbekov aǵalarymyz «túbi bir túrki halyqpyz, burynnan aǵaıyn-baýyrmyz» degen sózderdi aıtyp, oryndaryna otyrdy. Farıza apamyz bolsa, óziniń tilegin aıtyp-aıtyp aldy da: «Eı, Janar! Eger túrikter saǵan tıisip jatsa - aıt! Qylyshymyzdy súıretip baramyz!» - dep namysty bir qaırap jiberdi. Endi ol kisi osyndaı eshkimge uqsamaıtyn jalyndy sózimen erekshelenetin, der kezinde dóp basatyn aıtqyshtyǵy tańǵaldyratyn. Sondaı bir keremet adam edi. 1985 jyly «30 paıyz áıelder bılikke kelý kerek» degen Ortalyq komıtettiń qaýlysy shyqty. Sonda Qazaqstannyń barlyq óńirinde úshinshi hatshylyqqa qyzdar keldik. Sonda barlyq óńirge baryp: «Qaldaryń qalaı, qyzdar, senderge eshkim tıisip jatqan joq pa, tyńdamaı qoıyp jatqandar joq pa?» dep surap turatyn. Aımaqtarda istep júrgen bolsa, oblys basshysyna, aýdan bastyǵyna istep júrgen birinshi hatshylarǵa: «Mynaý meniń qyzym, mynaý meniń sińlim, sen qaraǵyń buǵan» dep óziniń týǵan qyzyn, týǵan sińlisindeı tapsyryp júretin», - deıdi O.Asanǵazy.
Odan bergi estelikterde depýtat O.Asanǵazy ol kisiniń kemeline jetip, Astanada Parlament depýtaty retindegi qyzmeti men aqyndyǵyn qatar atqarǵan tustaryna da az-kem toqtaldy.
«Astana qurylǵan kezde Parlamenttiń depýtaty retinde 1997 jyldyń 10 jeltoqsanynda keldi. Sodan beri apam - astanalyq. Astananyń árbir úıine, árbir sharasyna ol kisi bir azamattaı úles qosty. Sonyń 70 jyldyǵyn Tilder basqarmasy ótkizdik. Prezıdent ortalyǵynda «Farızanyń sińlileri» degen kesh ótti. Sonda apama jastardyń, elordalyqtardyń degen qumarlyǵy sol - syımaı qalǵan jurt úsh saǵat túregep turdy. Eshkim ketpedi. Kesh bir úıdiń dastarhan basyndaǵy otyrysyndaı boldy. Eshkim ketpedi, tipti sharshamady. Erteńinde Kongress holl saraıynda Farızanyń jeke shyǵarmashylyq keshi ótti. Sahna zalynyń ishi-syrtyn toltyrǵan halyq taǵy da Farızasyn tike turyp tyńdady. Eshkimdi jalǵan jyrmen, ásheıin shyǵarypsalma sózben tarta almaısyń. Farıza jyryn halyq qatty baǵalaıtyny osydan baıqalady», - dep túıdi sóz ol.
«Jalpy kim armansyz deısiń, biraq men oılaımyn, sol Narynnyń qumynan shyǵyp, osynshama qazaq sııaqty eldi ózine baǵyndyrǵan Farıza armansyz ótti, baqytty qazaqtyń qyzy! Bir adamǵa laıyq ómirden alatyn ornyn aldy da, tyńdatty da. Farıza máńgi qazaqtyń júreginde, qazaq qansha máńgi jasasa, qazaqtyń Farızasy da máńgi jasaıdy. Sol kisimen dastarhandas bolǵanyma, sińlisi bolǵanyma baqyttymyn!» - deıdi depýtat.