«Narynqoldyqtar qaı elde turady» - baspasózge sholý
***
«Egemen Qazaqstan» gazetinde Almatydaǵy Abaı atyndaǵy Qazaq memlekettik akademııalyq opera jáne balet teatrynyń dırektory Asqar Bóribaevpen aradaǵy suhbat basyldy.
«Úsh tulǵa -Ahmet Jubanov, Latıf Hamıdı, Muhtar Áýezov dúnıege ákelgen «Abaı» - ulttyq operanyń injý-marjany. Bul opera Batysta joǵary baǵalana bastady. Munyń aldynda «Abaı» operasyn byltyrǵy jyly Germanııada Ońtústik Tıýrıngııa opera teatrynda nemis rejısseri Ansgar Haag nemisshe aýdaryp, nemis tilinde qoıǵan. Sol kezde Abaı partııasyn Ońtústik Koreıanyń bas barıtony De Hı Shın oryndaǵan. Ajardy Kolýmbııadan soprano shyrqasa, Jırenshe Grekııadan boldy. Osyndaı ınternatsıonaldyq quram birinshi ret shet memlekette Abaıdy nemisshe sóıletti. Sondyqtan «Abaı» operasy - Eýropada tuńǵysh qoıylǵan ulttyq ónerimizdiń úlgisi. Ótken jyly bul opera Almatydaǵy Abaı atyndaǵy opera jáne balet teatrynda Alan Bóribaevtyń jańa redaktsııasymen qaıta qoıyldy. Italııadan rejısser, sýretshi, baletmeıster shaqyrylyp, jańadan sahnalaǵanbyz»,-deıdi dırektor. Osy jaıynda tolyq bilgińiz kelse, «Asqar BÓRІBAEV: Abaı teatry Abaı jolymen júrgende ǵana alǵa adymdaıdy» degen suhbatty oqyp shyǵyńyz.
***
«Aıqyn» gazetiniń búgingi sanynda « Narynqoldyqtar qaı elde turady» degen materıal berilgen. «Jazýshy Berdibek Soqpaqbaevtyń 90 jyldyq toıy ótetin Narynqol aýylyna at basyn tireı qalǵanymyzda, eń áýeli qalta telefondarymyz shyńq etti. «Bálenbeı degen kisi sizdi izdep, bálenbaı ret qońyraý shaldy» degen dástúrli habarlama bolar dep mán bermegenbiz. Sóıtsek, «Bılaın» baılanys operatorynan kelgen SMS eken. «Welcome to China!» dep tur!»,-dep jazady avtor. Bilýimizshe, Qazaqstan men Qytaı arasyndaǵy shekara kemi 3 shaqyrym jerde. Ortasyndaǵy beıtarap jolaq jáne bar. Sonda bul qaıdaǵy Qytaı? Artynsha telefon taǵy da shıqyldady. Bul joly «Dobro pojalovat v Kıtaı!» dep tur qasqa! Kózimiz tas tóbege shyqpasa da, tańdanyp qaldyq. Jergilikti aǵaıyn buǵan ábden boı úıretip alypty. «Telefondaryńyzdyń baptaý túımesin ashyp, jelini qolmen tańdańyzdar. Áıtpese, tarıf roýmıngpen esepteledi. Aqshalaryńyz eki ese artyq jumsalady» deıdi.
Osy basylymda « Sertıfıkat endi sergeldeńge salmaıdy» atty maqala jaryq kórdi. Májilis tóraǵasynyń orynbasary, «Nur Otan» fraktsııasynyń basshysy Darıǵa Nazarbaeva «qazaqstandyq mazmundy» damytý problemalaryna el Úkimetiniń nazaryn aýdartty. Keshe bıleýshi partııanyń parlamenttik fraktsııasy janyndaǵy Ekonomıkalyq saıasat keńesi, «Nur Otan» saılaýaldy Tuǵyrnamasynyń «Innovatsııalyq ekonomıka» baǵyty boıynsha sarapshylyq toby jáne Májilis komıtetteri birlesken otyrys ótkizgen bolatyn. Onda jer qoınaýyn paıdalanýshylardyń qazaqstandyq taýarlardy satyp alý máselesi qaraldy.
***
«Eksperss-K» gazetiniń búgingi sanynda «Dom razbıtyh serdets» degen maqala shyqty. Búginde Qazaqstanda 49 memlekettik jáne 9 jeke qarttar úıi jumys isteýde. Memlekettiń qamqorlyǵyna alynǵan qarttardyń jalpy sany jeti myńnan asyp otyr. Taǵy júzden astamy osy baspanaǵa kezekte turǵan kórinedi. «Dáýletti balalary bar bolsa da qarttar úıinde turýǵa májbúr ájeılerge qarasań, kózińe jas úıiriledi. Balalary ata-analaryn alyp kelip, olarǵa bul ýaqytsha ekenin aıtyp, ýáde beredi. Keıin ata-analary týraly umytyp ketetin jaǵdaılar kezdesedi»,-deıdi «Qarlyǵash» jeke qarttar úıiniń meńgerýshisi Irına Zaıtseva.
