Narynqol kartobynan frı jáne chıpsy óndirilmek
NARYNQOL. QazAqparat - Almaty oblysynyń Narynqol óńiri kartop óndirisin qolǵa alýǵa óte qolaıly aımaq. Qazirdiń ózinde bul jaqta 2 myńnan astam gektar alqapqa kartop ósirilýde. Bolashaqta Narynqol kartobynan frı jáne chıpsy óndirilý josparlanýda, dep habarlaıdy QazAqparat tilshisi.
Bir kezderi Narynqol óńirinde 8 myń gektardan astam jerde kartop ósirilgen. Qazirgi tańda tórtten bir bóligi qalǵan. Sondyqtan osy salaǵa erekshe nazar aýdarylyp, baıyrǵy kólemdi qaıtarý jospary tur. Máselen Tekes aýylyndaǵy «Órken» sharýa qojalyǵy negizinen kartop tuqymyn óndirýmen aınalysady. «Byltyr 200 gektar alqaptan 5 myń tonna ónim alynǵan. Qazir kóktemgi egis naýqanyna daıyndalyp tuqym irikteýge kiristi. Sharýashylyq mańaıdaǵy jáne oblystyń ózge aýdandaryn elıtaly jáne sýper elıtaly kartop tuqymymen qamtyp keledi. Narynqol óńirine ónimdiligi joǵary sheteldik kartop ta jersindirilgen. Sebebi sheteldik tuqym gektarynan 40-45 tonna ónim beredi. Al jergilikti sharýalar ósirip otyrǵan elıtaly tuqym 27-28 tonnadan aspaıdy», deıdi qojalyq jetekshisi Talǵat Núsipqojaev.
Bıyl oblystan kartop sharýashylyǵyn damytýǵa 240 mln teńge qarjy bólindi. Aýdanda servıstik daıyndaý ortalyqtary qurylyp, zamanaýı tehnıkamen jabdyqtalatyn boldy. Sondaı-aq kartop óndirisine Gollandııadan ınvestorlar da qyzyǵýshylyq tanytýda. Olar aldymen óńirde tuqym sharýashylyǵyn jolǵa qoımaq. Jylyna 7 myń tonna tuqymdyq kartop eksportqa shyǵarý kózdelgen. Odan bólek gollandııalyqtar Іle aýdanynda osy kartoptan frı jáne chıpsy shyǵaratyn kásiporyn salýdy josparlap otyr.
Raıymbek aýdanynyń ákimi Jolan Omarov ınvestorlarǵa qolaıly jaǵdaı jasaý úshin sýarmaly jerlerdi keńeıtý máselesin qolǵa alǵan. Bul maqsatta sýarý júıeleri qalpyna keltirilip, kanaldardyń arnalary tazartylmaq. Aýdan ákiminiń aıtýynsha, topyraǵy qunarly, balbonıti joǵary Narynqol jeri kókónisti de, dándi daqyldy da ósirýge qolaıly. Sondyqtan aýyspaly egistik tehnologııasyn saqtaı otyryp ózge da aýylsharýashylyq daqyldaryn ıgerý kózdelgen.
