Naryqtaǵy dári-dármektiń 35 paıyzy Qazaqstanda shyǵarylǵan
Bul týraly «Qazaqstannyń FarmMedIndýstrııasy» qaýymdastyǵynyń prezıdenti Rýslan Sultanov málimdedi. Onyń aıtýynsha, 8 jyl buryn bul kórsetkish 15-aq paıyzdy quraǵan. Al qazir el kásipkerleri preparattaryn álemniń 10 eline eksporttap otyr. Aldaǵy ýaqytta otandyq dáriler Vetnamǵa da satylatyn bolady. Aıta keteıik, tek byltyr ǵana qazaqstandyq óndirýshiler 100 jańa preparatty qoldanysqa engizdi.
«Otandyq dári-dármekterdiń tizimin ulǵaıtý kerek. Bizdiń kásipkerler jańa tehnologııalardy engizip, Qazaqstan men shet memleketterde suranysy joǵary preparattardy óndirip jatyr. Olardyń sapasy joǵary, halyqaralyq standarttarǵa saı keledi. Al baǵasy sheteldik balamalarǵa qaraǵanda áldeqaıda arzan. 2023 jylǵa deıin elimizde satylatyn dárilerdiń 80 paıyzy otandyq óndirýishlerge tıesili bolady degen josparymyz bar», - deıdi «Qazaqstannyń FarmMedIndýstrııasy» qaýymdastyǵynyń prezıdenti Rýslan Sultanov.
