Naryq qatysýshylary benzındi qaı valıýtada satyp alady
ASTANA. QazAqparat - Búgin Ortalyq kommýnıkatsııalar qyzmetinde aýyl sharýashylyǵy taýarlaryn óndirýshilerdi arzandatylǵan dızel otynymen qamtamasyz etý máselelerine arnalǵan brıfıngte «Gelıos» JShS Logıstıka jónindegi dırektory Artýr Nam jýrnalısterdiń suraǵyna jaýap bere otyryp, Reseıden janar-jaǵarmaıdy qaı valıýtada satyp alatyndaryn jarııa etti, dep habarlaıdy QazAqparat.
«Eki el arasynda eshqandaı jeńildik rejımi joq. Reseı Federatsııasynan taýar jetkizýdi álemdik baǵa belgileý sharttaryna sáıkes júzege asyramyz. Bizdiń reseılik seriktester Qazaqstanǵa nemese ózge memleketterge taýar eksporttaıtyn kezde baǵalardy salystyrady, saraptama jasaıdy jáne ózderine tıimdi tarapty tańdaıdy. Sodan keıin ǵana jetkizilimder júzege asady. Kóbinese, AQSh dollary arqyly eseptesemiz. Rýbl arqyly da janar-jaǵarmaı satyp alǵan kelisimsharttar bar», - dedi Artýr Nam.
