«Nartaı» fılminiń saýndtregin men jazǵan joqpyn - Aqtoty Raıymqulova

NUR-SULTAN. QazAqparat – Mádenıet jáne sport mınıstri Aqtoty Raıymqulova rejısser Gúlnár Sársenovanyń «Nartaı» fılmine qandaı qatysy bar ekenin aıtty, dep habarlaıdy QazAqparat tilshisi.

Ortalyq kommýnıkatsııalar qyzmetinde ótip jatqan brıfıngide BAQ ókilderi Mádenıet jáne sport mınıstrinen «Nartaı» fılminiń saýndtregin jazǵany úshin qansha qalamaqy alǵanyn surady.

Aqtoty Raıymqulova áýeli óziniń mınıstr laýazymymen birge ǵylymı jáne shyǵarmashylyq istermen aınalysýǵa quqyly ekenin eske saldy.

«Memlekettik qyzmet týraly zańnyń baptary boıynsha memlekettik qyzmetshiler pedagogıkalyq, ǵylymı jáne shyǵarmashylyq jumystarmen aınalysýǵa quqyly. Mysaly, sizder jýrnalıst bolyp júrip, mınıstrlikke taǵaıyndalsańyzdar nemese melekettik qyzmetke kelseńizder, óz mamandyǵyńyz boıynsha jýrnalıstik jumysyńyzdy toqtatpaıtyn shyǵarsyzdar. Sol sııaqty men mýzyka salasynyń mamanymyn», - degen mınıstr «Nartaı» fılmin túsirýshilerden eshqandaı qalamaqy almaǵanyn málimdedi.

«Kompozıtor retinde kóp shyǵarma jazdym. Biraq «Nartaı» fılminiń saýndtregin jazýǵa usynys kezinde túsken bolatyn. Men odan bas tarttym jáne qabyldamadym. Sondyqtan eshqandaı qalamaqy alǵan joqpyn, mýzykasyn da jazǵan joqpyn. Bul – jalǵan aqparat», - dedi Aqtoty Raıymqulova