#NarrýNaýryz: Óskemen ákimi qaıyrymdylyq chellendjin bastady

ÓSKEMEN. QazAqparat - Shyǵys Qazaqstan oblysynyń ortalyǵy Óskemen qalasynyń ákimi Jaqsylyq Omar Naýryz merekesi qarsańynda #NarrýNaýryz chellendjdi bastap berdi, dep habarlaıdy QazAqparat ákimniń baspasóz qyzmetine silteme jasap.

Óskemen ákimi qaıyrymdylyq kómek kórsetý jáne muqtaj adamdarǵa qoldaý kórsetý maqsatyndaǵy bastamany Instagram jelisindegi akkaýntynda júrgizgen tikeleı efır kezinde jarııa etti.

«Qala ákimi kópbalaly otbasynan shyqqan 16 jasar Ánýar Qadyrovtyń hatyn oqyp berdi. Jasóspirim ózine jáne aǵalary men ápkesine Naýryz meıramy qarsańynda kompıýter syıǵa tartýyn suraǵan», - delingen habarlamada.

Jaqsylyq Omar balanyń hatyna jaýap retinde áriptesterimen birge noýtbýk syılap, #NarrýNaýryz chellendjin jarııalaýdy sheshkenin jetkizdi.

«Qalanyń barlyq kásipkerlerin, qaıyrymdy jandardy chellendjge belsendi qatysýǵa jáne ıgi ister jasaýǵa shaqyramyn. Naýryz- meıirimdilik pen jasampazdyqtyń merekesi», - dedi Jaqsylyq Omar.