Narkologııalyq jáne psıhonevrologııalyq anyqtamalar elektrondy nusqada beriledi

ASTANA. QazAqparat - Qazaqstanda narkologııalyq jáne psıhonevrologııalyq dıspanserler anyqtamalary tek elektrondy nusqada beriledi. Bul týraly Parlament Májilisinde «Tsıfrlyq Qazaqstan» baǵdarlamasyna arnalǵan Úkimet saǵatynda Densaýlyq saqtaý vıtse-mınıstri Oljas Ábishev málim etti, dep habarlaıdy QazAqparat tilshisi.

Otyrys barysynda Ábdimanap Bekturǵanov keıbir qyzmet túrlerin alý kezinde turǵyndarǵa belgili bir qıyndyqtar týyndaǵanyn atap ótti.

«Psıhonevrologııalyq dıspanserden anyqtama berý memlekettik qyzmetine toqtalǵym keledi. Bul anyqtamanyń jumysqa ornalasý kezinde, júrgizýshi kýáligin alý barysynda, sondaı-aq túrli lıtsenzııalar alatyn kezde qajetti ekenin bilemiz. Búginde bul qyzmetti medıtsınalyq uıymnyń ózi tikeleı qaǵaz túrinde júzege asyrady. Sonymen qatar, adamdar qujattardy kezekte turyp tapsyrady, ıaǵnı aldyn ala jazylý, jedel qyzmetter kórsetý qarastyrylmaǵan. Osyǵan uqsas kórsetiletin qyzmetterdi elektrondyq nusqaǵa kóshirý josparda bar ma? Mysaly, narkologııalyq nemese týberkýlezge qarsy uıymnyń anyqtamasy da osy tártippen berilip jatyr», - dedi depýtat.

Óz kezeginde QR Densaýlyq saqtaý vıtse-mınıstri Oljas Ábishev jaqynda bul qyzmetter elektrondy tártipte beriletinin atap ótti.

«Osy jyldyń ortasynda biz psıho, narko jáne týberkýlezge qatysty qyzmetterdi ońtaılandyrýdan ótkizip, tıisti qaýlyǵa ózgerister men tolyqtyrýlar engizildi. Endi Densaýlyq saqtaý mınıstrliginiń buıryǵynyń jobasy Ádilet mınıstrliginen tirkeýden ótýin kútip otyrmyz. Sonymen qatar, búginde tehnıkalyq máselelerdiń barlyǵy sheshilýde. Ádilet mınıstrliginen tirkeýden ótkennen keıin, sol qyzmet avtomatty túrde qaǵaz nusqadan elektrondyq júıege tolyǵymen aýystyrylady. ıAǵnı «Elektrondy úkimet» portalynda qoljetimdi bolady», - dedi O. Ábishev.

Munymen qosa, Aqparat jáne kommýnıkatsııalar mınıstri Dáýren Abaev júrgizýshi kýáligin alý kezinde de medıtsınalyq tekserýden qaıta-qaıta ótýdiń qajeti joq ekenin jetkizdi.

«Buryndary júrgizýshi kýáligin aýystyrý úshin adamdar qaıtadan mamandandyrylǵan halyqqa qyzmet kórsetý ortalyqtarynda dárigerdiń tekserýinen ótý kerek bolatyn. Qazir tek birinshi ret kelse ǵana dáriger tekserýinen ótedi. Osy oraıda ekinshi ret barý qajettigi talabyn joıýdyń arqasynda, ortalyqtardaǵy kezek sanyn 85 paıyzǵa qysqarttyq», - dedi mınıstr.