Narkografıtılerdi boıaý kezinde «zakladka» taýyp alǵan kezimiz boldy - erikti

ASTANA. KAZINFORM – «Jastar rýhy» jastar qanatynyń belsendileri men eriktileri úsh jyldan beri esirtki taratý jáne nasıhattaýmen kúresip keledi. Olardyń tájirıbesinde jasyrylǵan esirtkini taýyp alý deregi tirkelgen.

— Jastar bul naýqandy osydan úsh jyl buryn bastaǵan. Bastama búginde nashaqorlyq pen esirtki qylmystaryna qarsy kúrestiń basty baǵyttarynyń birine aınaldy. Nátıjesi de jaman emes. «Esirkige jol joq» aktsııasynda biz naqty 20 aımaqta narkografıttılerdi boıaýmen aınalysamyz. Ol jerde belsendilerimiz osy kúnge deıin 12 myńnan astam grafıtılerdi boıap shyqty. Qabyrǵalardaǵy bul jazýlar esirtki satatyn Telegram arnalardy jarnamalaǵandyqtan, aldymen solardy joıý kerek dep esepteımiz. Budan bólek, jastardy qoldaý keńesi de quryldy. Ol jerde arnaıy daıyndalǵan mamandar túsindirý jumystaryn júrgizýmen aınalysady, - dedi atalǵan uıym tóraǵasy Aqerke Iskanderova «Jibek Joly» arnasyndaǵy «BúginLive» baǵdarlamasynda.

Onyń aıtýynsha, qyzmet barysynda túrli keleńsizdikter de kezdesip turady eken.

– Bizdiń eriktiler narkografıtılerdi boıaý kezinde «zakladka» taýyp aldy. Mundaı jaǵdaı alǵash ret bolyp turǵandyqtan, jastar ne isterin bilmeı abdyrap qaldy. Keıin mamandarmen aqyldasa kele mundaı jaǵdaıda ne isteý kerektigi týraly algorıtm jasap shyqtyq, - dedi uıym basshysy.

Aqerke Iskanderova esirtkimen kúres jumystary tsıfrlandyrylyp jatqanyn da atap ótti.

— «Jastar rýhy» JQ eki jyl buryn Astana hab-pen birlesip, respýblıkalyq hakaton ótkizgen bolatyn. Ol jerde jastar tóńiregindegi túıitkildi túıinder talqylandy. Jıyn sheńberinde ІT salasynyń úzdikteri esirtkimen kúres jumystaryna JI engizý týraly usynystaryn da aıtqan. Búginde bul ІT sheshimder qoldanysqa engizildi, - dedi ol.

Aıta keteıik, Astanada esirtki taratqan qyz 10 jylǵa sottaldy.