Narkobızneske tıesili 600-den astam bank shoty buǵattaldy — Prokýratýra

ASTANA. KAZINFORM — «Zań men Tártip» tujyrymdamasyn iske asyrý aıasynda prokýrorlar polıtsııa qyzmetkerlerimen birlesip, esirtki qylmystary men ınternet-alaıaqtyqqa qarsy is-qımyl máselelerin talqylady. Bul týraly Qazaqstan bas prokýratýrasy málim etti.

— Búginde birqatar naqty nátıjelerge qol jetkizildi. Oblys aýmaǵynda úsh esirtki zerthanasy anyqtaldy. Esirtki satatyn ınternet-dúkenderdiń qarjy arnalaryn buǵattaý jumystary júrgizilýde — narkobızneske tıesili 600-den astam bank shoty buǵattalyp, jalpy somasy 18 mıllıon teńgege jýyq qarajat toqtatyldy, — delingen habarlamada.

Internet-alaıaqtyqqa qarsy kúres sheńberinde antıfrod-ortalyǵy arqyly 230 mıllıon teńgeden astam alaıaqtyq jolmen alynǵan qarajat buǵattaldy. Sondaı-aq, Qazaqstan Respýblıkasynyń Azamattyq kodeksiniń 953-babyna sáıkes, dropperlerden zańsyz baıyǵany úshin 22 mıllıon teńgeden astam qarajat óndirildi, al polıtsııa organdarynyń usynýy boıynsha 42,5 mıllıon teńgeden astam somaǵa 32 jalǵan nesıeniń óndirip alýy ýaqytsha toqtatyldy.

Keńes barysynda problemalyq máseleler, olardy sheshý joldary qaralyp, aldaǵy birlesken is-qımyldar boıynsha naqty ýaǵdalastyqtarǵa qol jetkizildi.

Zańdylyqty qamtamasyz etý jáne azamattardyń quqyqtaryn qorǵaý baǵytyndaǵy jumys jalǵasyn tabady.

Buǵan deıin habarlanǵandaı, prokýratýra Telegram-da oqýshylardy arbaıtyn kontent anyqtalǵanyn jazǵan bolatynbyz.