Narıman Muqyshev áleýmettik jelilerdegi saýaldarǵa nege jaýap bermeıdi

NUR-SULTAN. QazAqparat - Eńbek jáne halyqty áleýmettik qorǵaý vıtse-mınıstri Narıman Muqyshev 42 500 teńge áleýmettik tólemge qatysty áleýmettik jelilerde atyna túsken saýaldardyń barlyǵyna birdeı nelikten jaýap bere almaıtyndyǵyn túsindirdi, dep habarlaıdy QazAqparat tilshisi.

«Maǵan ashý-yzamen nege jaýap bermeısiń dep jazyp jatady. Osyny túsindirgim keledi. Men basqa máselege (tsıfrlandyrý) jetekshilik jasasam da 42 500 teńgege qatysty óte kóp suraq túsedi. Olardy sheshý qajettigin túsingendikten jaýaptaryn beıindi bólimshelerden surap, odan keıin jiberemin. Instagram-da táýligine 500, al Facebook-te 200-300 habarlama alamyn. Bul jazbanyń astyna qaldyrylatyn shamamen 1-2 myń pikirdi qospaǵanda. Onyń barlyǵyna jaýap berý múmkin emes. Kúndelikti múmkindigimshe jaýap beremin. Biraq, suraqtar áldeqaıda kóp túsetindikten úlgermeımin. Sondyqtan áli jaýap bermegenderim túsinistik tanytsa eken», - dep jazdy vıtse-mınıstr Instagram paraqshasynda.

Onyń atap ótýinshe, jazbalaryna qaldyrylǵan saýaldarǵa Eńbek mınıstrligindegi áriptesterine jaýap berýdi ótingen. Al ózi jeke kelgen saýaldarǵa jaýap berýge tyrysyp keledi.

«Biraq, kóptegen suraqtar qaıtalanady. Barlyǵy da olardyń jaǵdaılaryn jeke alyp qarastyrýdy talap etedi. Eger árbir jaǵdaıdy jeke alyp qarasam, onda maǵan júıeli máselelerdi sheshýmen múldem aınalyspaýǵa týra keletindigin túsinýlerińizdi ótinemin. Sol sebepti saýaldardyń basym bóligin qamtıtyn jazba jazyp júrmin. Saýal qoımastan buryn olardy oqyp alýlaryńyzdy ótinemin», - dedi Narıman Muqyshev.

Sonymen qatar [e-mail] jáne [e-mail] elektrondy poshtalaryna da táýlik boıy birneshe myń saýal túsetindigin jáne ondaǵan maman únemi olarǵa jaýap berýge tyrysatyndyǵyn atap ótedi.