Narıman Qurbanov pen Zeınolla Ydyrysov Horvatııadaǵy álem kýbogy kezeńinde fınalǵa shyqty
ASTANA. KAZINFORM – Horvatııanyń Osıek qalasynda sporttyq gımnastıkadan álem kýbogynyń kezekti kezeńi bastaldy.
Ulttyq olımpıadalyq komıtettiń málimetinshe, irikteý kezeńiniń alǵashqy kúniniń qorytyndysy boıynsha Qazaqstan quramasynyń eki ókili fınalǵa joldama aldy.
At snarıadyndaǵy jattyǵýda Narıman Qurbanov 14,766 upaı jınap, birinshi orynmen sheshýshi kezeńge ótti.
Zeınolla Ydyrysovty tóreshiler 14,700 upaımen baǵalap, ol irikteýde ekinshi orynǵa turaqtady.
Aıta keteıik, álem kýbogy kezeńiniń fınaly 10 jáne 11 sáýir aralyǵynda ótedi.
Osyǵan deıin kórkem gımnastıkadan Tashkenttegi álem kýbogynda el quramasynan kimder baq synaıtynyn jazǵanbyz.
