Narıman Kýrbanov Olımpıada joldamasyn alýǵa bir qadam jaqyndady

ASTANA. KAZINFORM – Qatar astanasy Doha qalasynda sporttyq gımnastıkadan ótip jatqan álem kýboginiń sońǵy kezeńinde 4 qazaqstandyq gımnast fınalǵa shyqty.

QR Sportty damytý dırektsııasy málim etkendeı, gımnastıkalyq at snarıadynda Narıman Kýrbanov alǵashqy irikteýlerden ekinshi oryn alyp, fınalǵa ótti. Ol 15.033 upaı jınaǵan. 

Al Mılad Karım men Dmıtrıı Patanın erkin jattyǵý synynda fınalǵa shyqty. Karım irikteýdi birinshi, Patanın úshinshi orynmen aıaqtaǵan. 

Áıelder arasynda Aıda Baýyrjanova kózge tústi. Ol qol tirep sekirýden fınalǵa joldama alǵan segiz sportshynyń qataryna endi. 

Aıta ketelik, Dohadaǵy álem kýbogi kezeńinde Narıman Kýrbanovtyń Parıj Olımpıadasyna joldama alý múmkindigi mol. Oǵan tórtjyldyq dodasyna barý úshin Katar tórinde úzdik úshtikten kóriný kerek. Onyń joldama jolyndaǵy basty qarsylasy - taıpeılik Lı Chı Kaı. 

Al Mılad Karımı lıtsenzııa máselesin byltyrǵy álem chempıonatynda sheship qoıǵan bolatyn. 
Dohadaǵy álem kýbogi kezeńinde erlerden 12, áıelderden 8 sportshy Parıj Olımpıadasyna joldama alady.

Esterińizge sala keteıik, kesha ǵana qazaqstandyq badmıntonshy Dmıtrıı Panarın el qorjynyna Parıj Olımpıadasynyń 33-shi lıtsenzııasyn syılaǵan bolatyn. 

Dohadaǵy álem kýbogi kezeńine synǵa túsip jatqan Qazaqstan quramasy:

- Mılad Karımı;
- Dmıtrıı Patanın;
- Dıas Toıshybek;
- Narıman Kýrbanov;
- Aıda Baýyrjanova;
- Darıa ıAsınskaıa.

Týrnır 17-20 sáýir aralyǵynda ótedi.