Narıman Qurbanov Qatarda ótip jatqan Álem kýbogy kezeńinde qola júldege ıe boldy
ASTANA. KAZINFORM – Narıman Qurbanov sporttyq gımnastıkadan Dohada (Qatar) ótip jatqan Álem kýbogynyń kezeńinde qola júldege ıe boldy, dep habarlaıdy olympic.kz.
Ol at snarıadyndaǵy jattyǵýdyń fınalynda sátti óner kórsetti. Parıj-2024 Olımpıadasynyń kúmis júldegeri 14.566 upaı jınap, Álem kýbogynyń qola júldegeri atandy.
Bul synda jeńisti armenııalyq Gamlet Manýkıan jeńip aldy — 14.700 upaı. Al Qytaı ókili ıAnmın Hýn 14.666 upaımen ekinshi orynǵa taban tiredi.
Zeınolla Ydyrysov 14.200 upaı jınap, tórtinshi orynǵa turaqtady.
Aıta keteıik, qazirgi tańda Qazaqstan quramasynyń enshisinde úsh medal bar. Erkin jattyǵýlarda Mılad Karımı birinshi oryn ıelense, Altynhan Temirbek kúmis júldeni jeńip aldy.
19 sáýirde Karımı kermedegi jattyǵýlarda medal úshin kúresedi. Al Temirbek tireýishpen sekirýden fınalda óner kórsetedi.