Naryqtyq báseke: Mercedes Germanııadaǵy zaýyttarynyń birin jabýy múmkin
ASTANA. KAZINFORM – Mercedes-Benz qyzmetkerleri shyǵyndardy azaıtýǵa kelispese, kompanııa Germanııadaǵy óndiris kólemin qysqartyp, zaýyttarynyń birin jabýy múmkin, dep habarlaıdy BILD.
Mercedes basshylyǵy qyzmetkerlerge tólenetin birqatar tólemdi, sonyń ishinde demalys aqysy men rojdestvolyq bonýstardy qaıta qaraýdy talap etip otyr. Kompanııa 35 saǵattyq jumys aptasynyń sharttaryn da ózgertkisi keledi.
Mercedes ókilderiniń pikirinshe, Germanııadaǵy óndiris shyǵyndarynyń joǵary bolýy kásiporyndardyń básekege qabilettiligin tómendetip otyr. Buǵan qosa, ásirese Qytaı naryǵynda avtokólik satylymynyń tómendeýi kompanııaǵa qosymsha qysym túsirip jatyr.
Wirtschaftswoche málimetinshe, kompanııa basqarmasynyń bir múshesi Germanııadaǵy óndiris shyǵyndary aıtarlyqtaı azaımasa, Mercedes Eýropanyń basqa elinde jańa zaýyt salýy múmkin ekenin qyzmetkerlerge eskertken. Óndiristik keńes ókilderi mundaı málimdemeni «bopsalaý» jáne «asa qatań qoqan-loqy» dep baǵalady.
Qaı zaýyttyń jabylýy múmkin ekeni ázirge aıtylǵan joq. Sonymen qatar Mercedes Majarstandaǵy óndirisin keńeıtip jatyr. Kechkemettegi kásiporyn keleshekte jylyna 400 myńǵa deıin avtokólik shyǵara alady.
Buǵan deıin Mercedes basshylyǵy Germanııadaǵy zaýyttardyń óndiristik qýaty kompanııa qajettiliginen edáýir joǵary ekenin málimdegen edi.
Aıta keteıik, buǵan deıin Mitsubishi Pajero jeti jyldan keıin naryqqa qaıta oralǵanyn jazdyq.
Al Volkswagen Germanııadaǵy tórt zaýytyn kezeń-kezeńimen jabatyn boldy.
