Naryqta jumyrtqa satatyn deldaldar kóbeıgen
ASTANA. KAZINFORM – Óńirlik taýar naryqtarynyń shekarasynda 34 negizgi qus fabrıkasy jumys isteıtini belgili boldy. Bul týraly Qazaqstan Respýblıkasy Básekelestikti qorǵaý jáne damytý agenttigi jazdy.
2022 jyly elimizde jumyrtqa óndirisiniń kólemi (+4,2%), eksport (+0,2%) oń serpin men ımport kólemi 2,4% - ǵa qysqarǵany baıqalǵan. Al, 2023 jyly óndiris kólemi (-2,1%), eksport (-17%) tómendese, ımport (+50% - ǵa) ulǵaıǵan.
Sonymen qatar, ımporttalatyn premıksterdiń, veterınarlyq preparattardyń, oraýysh materıaldardyń qymbattaýy 2023 jyly taýyq jumyrtqasy baǵasynyń 13% - ǵa ósýine sebep boldy.
2022 jyldyń aıaǵy men 2023 jyldyń basynda baıqalǵan jumyrtqa baǵasynyń ósý qarqynyn tómendetý úshin jedel sharalar kesheni qabyldandy. Jumyrtqa óndirýshiler men kóterme saýdagerlerge 11 habarlama jiberildi. Shymkent q. (Shymkent qus), Almaty oblysynda (Sary-Bulaq, Alsad), Qostanaı (Jas-Qanat), Túrkistan (Bes-qara), SQO (Adel qus, Alekrı), Aqmola (Kýrochka rıaba) taýyq jumyrtqalaryn óndirýshilerge qatysty 8 tergeý júrgizildi. Salynǵan aıyppuldardyń jalpy kólemi 124,8 mln. teńgeni qurady.
Sonymen qatar, jumyrtqalardy kóterme saýdada ótkizý naryǵyn turaqty baǵalyq baqylaý jaǵdaıynda kásipker emes jeke tulǵalar arqyly qus fabrıkalarynyń ónimdi ótkizý kóleminiń ulǵaıýy baıqalady.
Sondaı-aq, saýda jelileriniń áleýmettik mańyzy bar azyq-túlik taýaryna 15% túrindegi saýda ústemesiniń belgilengen mólsherin saqtamaý faktileri anyqtaldy. Osy faktiler boıynsha tıisti materıaldar Memlekettik kirister komıtetine jáne quzyreti boıynsha saýda komıtetine jiberildi.
Tutastaı alǵanda, agroónerkásiptik keshenniń ózge taýar naryqtarynǵydaı, taldaý sheńberinde negizgi nazar aýyl sharýashylyǵy taýar óndirisin damytý sharalaryna aýdarylady. Bul agroónerkásiptik keshenniń monopolııalyq emes taýar naryqtaryn tikeleı jáne janama baǵalyq retteý quraldaryn qysqartý, jeńildikti kredıtteý úlesin ulǵaıtý, aýyl sharýashylyǵy óndirýshileriniń saýda jelileri men ózge de ınfraqurylymǵa kedergisiz qol jetkizýin qamtamasyz etý.
