Naryqqa sheteldik bankterdiń kelýine múddelimiz — Qarjy naryǵyn retteý agenttigi

ASTANA. KAZINFORM — Qazaqstan aýmaǵynda fılıalyn ashqysy kelgen sheteldik bankter aktıvine qoıylatyn talap 10 mlrd dollarǵa deıin tómendetildi. Bul týraly QR Qarjy naryǵyn retteý jáne damytý agenttigi tóraǵasynyń orynbasary Oljas Qızatov aıtty.

O. Qızatovtyń aıtýynsha, Ońtústik-Shyǵys Azııa men Shyǵys Eýropa bankteri tarapynan qyzyǵýshylyq bar.

— Bul bankterdiń ataýlaryn naqty aıta almaımyz, sebebi olar qazir bank naryǵyna kirý múmkindigin qarastyrý kezeńinde tur. Ázirge eshqandaı túpkilikti sheshimder qabyldanǵan joq, sondyqtan mundaı aqparatty jarııalaı almaımyz. Biraq belgili bir qyzyǵýshylyq bar. Nege deseńiz, biz qazirgi zańnamalyq normalar aıasynda bank fılıaldaryn ashýǵa qoıylatyn talaptardy tómendetip jatyrmyz. ıAǵnı, qazir sheteldik bank Qazaqstan aýmaǵynda óz fılıalyn ashqysy kelse, onyń aktıvteri keminde 20 mlrd AQSh dollaryn quraýy kerek. Bul norma bes jyl boıy qoldanysta bolǵanymen, birde-bir sheteldik bank Qazaqstanda fılıal ashpady. Ózimizdiń qadaǵalaý aıasyndaǵy aqparatqa súıenip, bizben tyǵyz saýda jáne ekonomıkalyq baılanystaǵy elder tarapynan bank ashýǵa qyzyǵýshylyq baryn baıqap otyrmyz. Ol elderdegi bankterdiń aktıvteri qandaı ekenin zerttedik. Sol zertteýler negizinde talapty 20 mlrd-tan 10 mlrd AQSh dollaryna deıin tómendetý usynyldy, — dedi O. Qızatov Senatta ótken brıfıngte.

Onyń aıtýynsha, talaptardy tómendetý sheteldik bankterdiń Qazaqstan naryǵyna kirý protsesin jedeldetedi.

— Sheteldik bankter qazir bar múmkindikti zerdelep jatyr. Biz iri sheteldik bankterdiń kelýine múddelimiz. Eger olar qujattaryn tapsyrsa, biz ol qujattardy múmkindiginshe qysqa merzimde qaraýǵa tyrysamyz, — dedi agenttik ókili.

Aıta keteıik, búgin Senat tutynýshylar quqyǵyn qorǵaý zańyna 24 túzetý engizip, Májiliske keri qaıtardy. Zańda Qazaqstanda sheteldik bankterdi ashýǵa qoıylatyn talaptardy jeńildetýge baǵyttalǵan túzetýler de bar.