Náreste ólimi: Vıtse-mınıstr bastaǵan dárigerler toby Atyraýǵa keldi

ATYRAÝ. QazAqparat – Atyraý oblysyna QR Densaýlyq saqtaý vıtse-mınıstri Lázzat Aqtaeva bastaǵan bir top maman keldi, dep habarlaıdy QazAqparat tilshisi.

«Qazirgi ýaqytta reanımatolog dárigerler, neonatologtar, akýsher-gınekologtar keldi. Olardyń arasynda Pedıatrııa jáne balalar hırýrgııasy ulttyq ǵylymı ortalyǵynyń dırektory Rıza Boranbaeva da bar. Barlyǵy – jeti maman. Olardan bólek, respýblıkalyq ortalyqtardyń mamandary, Nur-Sultan qalasynyń Ana men bala ulttyq ǵylymı ortalyǵynyń akýsher-gınekology men anestezıolog-reanımatology keldi», - deıdi Atyraý oblysy Densaýlyq saqtaý basqarmasynyń basshysy Mánshúk Aımurzıeva.

Onyń aıtýynsha, 2019 jyldyń basynan beri Atyraýda qalalyq perzenthanany ekinshi deńgeıden úshinshi deńgeıge ótkizý jumysy júrip jatyr. Osy maqsatta oblystyq perınataldyq ortalyqtyń anestezıolog-reanımatology osynda aýystyrylǵan, eki neonatolog, tájirıbeli mamandar qabyldanǵan. Aqtóbe oblysynan taǵy eki neonatolog maman keledi.

M. Aımurzıevanyń sózine qaraǵanda, oblystyq perınataldyq ortalyq ta kúsheıtiledi. Ketken dárigerlerdiń ornyna Atyraýdan, elimizdiń basqa óńirinen mamandar tartylady.

Eske sala ketsek, Atyraý oblystyq perınataldy ortalyǵynyń basshysy men dárigeri jańa týǵan náresteni tońazytqysh kamerasyna salyp óltirdi degen kúdikke ilindi.

Sybaılas jemqorlyqqa qarsy is-qımyl agenttiginiń habarlaýynsha, dárigerler náreste ólimi faktisin jabý úshin para bermek bolǵan.

Avtory: A.Sokolov