Narendra Modı Úndistanda bılikte eń uzaq otyrǵan ekinshi premer-mınıstr atandy

ASTANA. KAZINFORM – Narendra Modı Úndistan úkimetiniń basshysy qyzmetinde úzdiksiz 4 078 kún jumys istep, Indıra Gandıdiń rekordyn jańartty. Bul týraly India Today basylymy habarlady.

2025 jylǵy 25 shildedegi jaǵdaı boıynsha Modı premer-mınıstr qyzmetinde úzdiksiz 4 078 kúnin ótkizdi. Buǵan deıin Indıra Gandı bul laýazymda 4 077 kún bolǵan (1966 jyldyń qańtarynan 1977 jyldyń naýryzyna deıin).

Osylaısha Narendra Modı el tarıhynda úzdiksiz qyzmet etken premer-mınıstrler arasynda ekinshi orynǵa shyqty. Birinshi orynda – Úndistannyń tuńǵysh premer-mınıstri Djavaharlal Nerý.

Modı óziniń saıası mansabyn 2001 jyly Gýdjarat shtatynyń bas mınıstri retinde bastady. Sodan beri ol 24 jyl boıy – shtattyq deńgeıde de, ulttyq deńgeıde de saılaý arqyly kelgen úkimetterdi basqardy. Mundaı kórsetkishke Úndistanda odan basqa eshbir premer-mınıstr qol jetkizbegen.

Sonymen qatar, Narendra Modı – Úndistan táýelsizdigin alǵan 1947 jyldan keıin dúnıege kelgen jalǵyz premer-mınıstr.

Ol basqaratyn «Bharatııa djanata partı» (Úndistan halyq partııasy) úsh birdeı jalpyulttyq saılaýda qatarynan jeńiske jetti. Mundaı nátıjege buǵan deıin tek Djavaharlal Nerý ǵana qol jetkizgen.

Ótken jyldyń maýsym aıynda Ulttyq demokratııalyq alıans (NDA) quramyndaǵy Úndistan halyq partııasy jeńiske jetkennen keıin Narendra Modı úshinshi merzimge premer-mınıstr qyzmetine resmı túrde kiristi.

Aıta keteıik, Úndistanda jalǵan elshilik ashqan adam qamaýǵa alyndy.