Narcostop jobasy: 800-ge jýyq esirtki taratqan Telegram-arna men ınternet-dúken buǵattaldy

ALMATY. KAZINFORM — Almatyda «Narcostop» jobasy boıynsha atqarylǵan jumystardyń qorytyndysy jarııalandy. 

Jobanyń jetekshisi Nurjan Jaqypovtyń aıtýynsha, mektepterde, kolledj ben joǵary oqý oryndarynda profılaktıkalyq dáris oqylyp, oǵan 3 891 oqýshy qatysty. Stýdentter úshin de sıntetıkalyq esirtkilerdiń ınternet-jarnamasynyń aldyn alý boıynsha 20 dáris ótip, ol 1 950 adamdy qamtydy.

Joba aıasynda Call-ortalyq pen senim telefony jumys istedi. Mamandar bir jyl ishinde 211 ótinish qabyldap, olar boıynsha jumys atqardy. Odan bólek quqyqtyq top esirtkige táýeldi adamdar men olardyń otbasylaryna 468 tegin keńes berdi.

— Jobanyń negizgi baǵytynyń biri — tyıym salynǵan kontentti onlaın baqylaý. Jumys barysynda 797 resýrs anyqtalyp, buǵattaldy. Onyń ishinde 726 Telegram-arna men esirtki taratqan 71 ınternet-dúken bar. Avtomattandyrylǵan baqylaý júıesin ázirleý bastaldy, — dedi Nurjan Jaqypov.

Ol Almatyda esirtki jarnamasy beınelengen graffıtıdi joıý boıynsha 112 aktsııa ótkenin atap ótti. Bul jumystarǵa 783 erikti qatysqan.

— Eriktilerdiń eń úlken jetistigi — 3 000-nan astam narkograffıtıdi joıdy. Sonymen qatar joba jumysy BUU Esirtki quraldary jónindegi komıssııasynyń 68-sessııasynda tanystyryldy. Komanda AQSh-ta bilim alyp, tájirıbe almasyp kelip, el ishinde jasóspirimderge arnalǵan sporttyq is-sharalar men baǵdarlamalardy qoldaýdy jalǵastyrdy, — dedi Nurjan Jaqypov.

Eske salaıyq, buǵan deıin Almatyda esirtkige mas taksı júrgizýshisi adam tasyǵanyn jazǵanbyz.