Narazylyqqa shyqqan bes jańaózendikke eskertý jasalyp, bosatyldy - Bas prokýratýra

ASTANA – Elordada narazylyq sharasyn uıymdastyrǵan jańaózendik jumysshylardyń arasynan bes belsendige eskertý jasaldy. Bul týraly Bas prokýratýranyń orynbasary Jandos Ómirálıev málim etti, dep habarlaıdy QazAqparat tilshisi.

«10 sáýirde Astanada Energetıka mınıstrligi ǵımaratynyń aldynda «BerÁli Mańǵystaý Company» JShS burynǵy qyzmetkerleri «BerÁli Mańǵystaý Company» jumysyn qalpyna keltirýdi nemese olardy «ÓzenMunaıGaz» kvazımemlekettik kompanııasyna jumysqa ornalastyrýdy talap etip, zańsyz mıtıng ótkizdi. Olar aktsııa ótkizýdiń habarlamalyq tártibin buzdy. Astananyń jergilikti atqarýshy organy olarǵa ruqsat habarlamasyn bermegen», - dedi Jandos Ómirálıev Májilistiń kýlýarynda BAQ ókilderiniń saýalyna jaýap bere turyp.

Onyń aıtýynsha, narazylyq bildirgen jumysshylarmen kezdesý ótkizilip, eńbek jaǵdaıy men jalaqy kólemin saqtaı otyra, basqa kompanııalarǵa jumysqa ornalasý usynylǵan. Biraq, olar usynystan bas tartyp, Energetıka mınıstrligi ǵımaratynyń aldynda zańsyz jınalys ótkizý áreketterin jalǵastyrǵan.

«Ákimshilik quqyq buzýshylyqtyń jolyn kesý úshin polıtsııa qyzmetkerleri olardy polıtsııa organdaryna jetkizdi. «BerÁli Mańǵystaý Company» JShS burynǵy qyzmetkerleriniń basym bóligi bosatyldy. Olar Mańǵystaýǵa bara jatyr. ÁQBtK-niń 488-baby boıynsha ruqsat etilmegen narazylyq aktsııasyna qatysqany úshin eń belsendi bes quqyqbuzýshy jaýapqa tartyldy, ıaǵnı olarǵa eskertý jasalyp, bosatyldy», - dedi Jandos Ómirálıev.

Eske salsaq, 10 sáýirde Energetıka mınıstrligi ǵımaratynyń aldyna 70-ke jýyq jańaózendik («Beraly Mańǵystaý Company» kompanııasynyń burynǵy qyzmetkerleri) jınaldy.

11 sáýirde Energetıka mınıstri Almasadam Sátqalıev Úkimet otyrysynan keıin BAQ ókilderine bergen suhbatynda vedomstvo ǵımaratynyń mańaıynda túnep shyqqan jańaózendik jumysshylardyń talaptary boıynsha resmı sheshim ázirlenip jatqanyn aıtty.

Bul máselege baılanysty pikir bildirgen vıtse-premer Altaı Kólginov zań aıasynda áreket etý qajettigin, «tenderden utylǵan kompanııanyń qaıtadan utyp shyqqanyn talap etý» durys emestigin aıtty.

«QazMunaıGaz» UK AQ apparatynyń basshysy Erhan Omarov bastaǵan arnaıy baılanys tobynyń mamandary Jańaózennen Astanaǵa kelgen jumysshylarmen kelissóz júrgizdi.

Jańaózendik jumysshylar sanktsııalanbaǵan mıtıng ótkizgeni úshin polıtsııaǵa jetkizildi.

Keıin narazylyqqa shyqqan munaıshylardyń kóshbasshylary málimdeme jasap, eki jaq kelisimge kelgenin habarlady.

Búgin narazylyq bildirgender talaptary boıynsha qurylǵan arnaıy komıssııa quramyna kiretin 10 adam astanada qalyp, qalǵany Jańaózenge qaıtty.