Napoleonnyń qylyshy Parıjdegi aýktsıonda 4,7 mıllıon eýroǵa satyldy

ASTANA. KAZINFORM — Parıjde frantsýz ımperatory Napoleon I Bonaparttyń qylyshy 4,7 mıllıon eýroǵa satyldy. Bul týraly Hotel Drouot aýktsıon saıtyna silteme jasap Le Figaro habarlady. 

Qarý bastapqyda 700 000 eýrodan 1 mıllıon eýroǵa deıin baǵalanǵan, bul ony «bássaýdada satylǵan Napoleon dáýiriniń eń qymbat artefaktileriniń birine» aınaldyrady.

—Bul soma 2007 jyly 4,8 mıllıon eýroǵa satylǵan Marengo shaıqasyndaǵy semser rekordyna jaqyn, - delingen habarlamada.

Aýktsıonda satylǵan qylysh Napoleonnyń jeke qarýy boldy. Bonapart 1802-1803 jyldary Versal manýfaktýrasynyń dırektory Nıkolıa-Noel Býtege qarýǵa tapsyrys berdi.

Napoleon I ımperator bolǵannan keıin de bıliginiń sońyna deıin qylysh ustady. Sodan keıin ol ony marshal Emmanýel de Grýchıge syılady. Sodan beri qarýdy qolbasshynyń urpaqtary saqtap keledi.

Aýktsıonda satylǵan bul qylyshtyń ekinshi nusqasy Sankt-Peterbýrgtegi Ermıtaj murajaıynda saqtaýly.

2021 jyly Bonaparttyń paradtyq qylyshy men 5 tapanshasy 2,87 mıllıon dollarǵa satylǵan bolatyn. Napoleon bul qarýlardy 1799 jylǵy memlekettik tóńkeris kezinde qoldanǵan.

Eske sala keteıik, Rım Papasy Lev XIV balalyq shaǵynda turǵan úı aýktsıonǵa shyqty.