Nannınde Qazaqstan men Qytaıdyń birlesken ǵylym jáne tehnologııa mektebi ashyldy

ASTANA. KAZINFORM — QHR Bilim mınıstrligi Qazaqstan men Qytaıdyń birlesken ǵylym jáne tehnologııa mektebin resmı túrde tirkedi.

Bul týraly «Qytaı tili kópiri» baıqaýynyń ashylýynda EUÝ prorektory Dýman Aıtmaǵambetov aıtty.

— Aldyńǵy kúni biz jaqsy habar aldyq. L. N. Gýmılev atyndaǵy EUÝ men Nannın ýnıversıtetiniń birlesken ınstıtýty — Nannın pedagogıkalyq ýnıversıteti janyndaǵy Eýrazııalyq ǵylym jáne tehnologııa mektebi QHR Bilim mınıstrligi tarapynan resmı túrde akkredıtatsııadan ótip, Qytaıda stýdentterdi memlekettik qabyldaý josparyna engizildi, — dedi EUÝ prorektory Dýman Aıtmaǵambetov.

Málimetke saı, mektep Qytaı aýmaǵynda bakalavr dárejesi boıynsha maman daıarlaıtyn bolady, jalpy stýdent sany 300-ge jetedi.

— Bul — Qazaqstan tarıhynda alǵash ret Qytaı aýmaǵynda ashylyp otyrǵan, Qazaqstannyń bastamasymen júzege asqan fılıal. Búginde Qazaqstan Qytaıdyń 30-dan astam jetekshi ýnıversıtetimen seriktestik baılanys ornatqan. Sondaı-aq qos dıplomdy baǵdarlamalardy, atap aıtqanda akademııalyq jáne birlesken dıplom berýdi júzege asyryp jatyr, — dep atap ótti ol.

Prorektordyń aıtýynsha, magıstranttardy daıarlaý boıynsha da jaqsy jańalyq bar.

— Biz QHR Bilim mınıstrliginen eki baǵdarlama boıynsha akkredıtatsııa aldyq: ekonomıka jáne halyqaralyq bıznes, sondaı-aq Shanhaı ýnıversıtetimen birlesip júzege asyrylatyn strategııalyq saýda baqylaýy. Bul baǵdarlamalar Qytaı aýmaǵynda magıstranttar daıarlaýǵa baǵyttalǵan, — dedi prorektor.

Aıta keteıik, búgin Astanada qytaı tilinen álemdik baıqaýdyń respýblıkalyq kezeńi ótip jatyr.