Nankınde «Aqjaıyq» korporatsııasynyń ınvestıtsııa jáne saýda ókildigi ashyldy
ORAL. KAZINFORM – Prezıdenttiń «Memlekettiń ınvestıtsııasy men jeke bıznestiń iri bastamalaryna birdeı nazar aýdarý qajet. Іri ınvestorlarmen qatar, orta jáne shaǵyn ınvestorlarmen de tyǵyz baılanysta jumys isteý kerek» degen tapsyrmasyna sáıkes, Qytaıdyń Nankın qalasynda Batys Qazaqstan oblysynyń «Aqjaıyq» áleýmettik-kásipkerlik korporatsııasynyń ınvestıtsııa jáne saýda ókildigi resmı túrde ashyldy.
Ókildik Ortalyq Azııa–Qytaı yntymaqtastyq ortalyǵy ǵımaratynda ornalasqan. Bul – elimizde óńirlik deńgeıde ashylǵan alǵashqy sheteldik ınvestıtsııalyq ókildik. Jańa qurylym Aqjaıyq óńiri men Qytaı kásipkerleri arasynda tikeleı iskerlik baılanys ornatýǵa múmkindik beredi.
Saltanatty ashylý rásimine Batys Qazaqstan oblysynyń ákimi Narıman Tóreǵalıev bastaǵan resmı delegatsııa qatysty.
SOHO kompanııasynyń bıznes jónindegi hatshysynyń orynbasary Vý Tsıýn ıÝı is-shara barysynda bastamanyń mańyzdylyǵyn atap ótti.
– Bul – ekijaqty yntymaqtastyqty jańa deńgeıge kóteretin strategııalyq bastama. Investorlardyń aqparatqa qoljetimdiligi artyp, jobalardy júzege asyrý merzimi aıtarlyqtaı qysqarady dep senemin, - dedi ol.
Keńseniń resmı ashylýynan keıin oblys ákimi Narıman Tóreǵalıev birqatar qytaılyq kompanııa ókilimen kezdesti. Kezdesýler barysynda Aqjaıyq óńiriniń ınvestıtsııalyq áleýeti tanystyrylyp, naqty jobalar boıynsha kelissózder ótti. Nátıjesinde, qytaılyq tarap eki iri óndiris ornyn salýǵa qyzyǵýshylyq tanytty:
biri – turmystyq qaldyqtardy qaıta óńdeý zaýyty, ekinshisi — kıik múıizinen dárilik ónimder shyǵaratyn kásiporyn.
– Batys Qazaqstan oblysy men Tszıansý provıntsııasynyń arasyndaǵy seriktestik ózara senim men naqty iskerlik baılanysqa negizdelip otyr. Biz barlyq qajetti qoldaýdy kórsetýge daıynbyz. Týyndaıtyn kez kelgen másele meniń jeke baqylaýymda bolady, - dedi Narıman Tóreǵalıev.
Qytaılyq ınvestorlar Batys Qazaqstan oblysynyń usynǵan jobalaryna erekshe qyzyǵýshylyq bildirdi. Olar kıiktiń etin tereń óńdep, múıizinen dári-dármek, etinen taǵam, terisinen kıim óndirisin jolǵa qoıýǵa nıetti. Sonymen qatar turmystyq qaldyqtardy óńdeý arqyly qaıta paıdalanýǵa jaramdy ónimder shyǵarýdy josparlap otyr.
SOHO holdınginiń vıtse-prezıdenti Dın Haıdyń aıtýynsha, aldaǵy ýaqytta eki jumys toby Batys Qazaqstanǵa kelip, jobalardyń júzege asyrylý múmkindigin zerdeleıdi.
– Bir top – kıik etin óńdeý salasyn, ekinshi top – turmystyq qaldyqtardy suryptaý jáne óńdeý baǵytyn zertteıdi. Biz bul iske ǵylymı zertteý ınstıtýttarynyń mamandaryn da tartamyz. Zaýyttyń kólemi men qýaty jergilikti shıkizat qory men óndiristik áleýetke baılanysty anyqtalady, - dedi ol.
Sapar aıasynda qazaqstandyq delegatsııa ChinaGaz kompanııasyna baryp, energetıkalyq kásiporynnyń zamanaýı tehnologııalarymen tanysty. Qytaılyq tarap Oral qalasynda jańa jylý elektr magıstralin salý boıynsha usynystaryn bildirdi.
Atalǵan kezdesý Qazaqstan Respýblıkasynyń Qytaı Halyq Respýblıkasyndaǵy Elshiliginiń qoldaýymen uıymdastyryldy.