Nan men birinshi surypty un baǵasy qymbattamaıdy - AShM

ASTANA. QazAqparat - Nan men birinshi surypty un baǵasy 2015 jyldyń 1 qyrkúıegine deıin qymbattamaıdy. Bul týraly búgin Májilistegi Úkimet saǵatynan keıin jýrnalısterge bergen suhbatynda Aýyl sharýashylyǵy mınıstri Asyljan Mamytbekov osylaı málim etti.

Mınıstrdiń aıtýyna qaraǵanda, 2015 jyldyń 1 qyrkúıegine deıin birinshi surypty nan men birinshi surypty un baǵasy qalypty saqtalady. Osyǵan baılanysty memlekettik sýbsıdııa bólinbek.

«Memlekettik komıssııamen sheshim qabyldandy, ol boıynsha kelesi jyldyń 1qyrkúıegine deıin birinshi surypty nan baǵasyn turaqtandyrý jáne birinshi surypty un baǵasyn arzandatý maqsatynda sharalar qabyldanady. Eshqandaı da baǵanyń kúrt ósýine jol berilmeıdi», - dedi Asyljan Mamytbekov.