Nan baǵasynyń sharyqtaýy oryn alǵan 2007 jylǵy stsenarıı qaıtalanbaıdy - Azyq-túlik kelisimshart korporatsııasy
ASTANA. Shildeniń 22-si. QazAqparat /Jasulan Amanbaıuly/ - Nan baǵasynyń sharyqtaýy oryn alǵan 2007 jylǵy stsenarıı qaıtalanbaıdy. Búgin jýrnalıstermen baspasóz máslıhatyn ótkizgen Azyq-túlik kelisimshart korporatsııasynyń basqarma tóraǵasynyń orynbasary Beıbithan Qabdyrahmanov osylaı atap kórsetti, dep habarlaıdy QazAqparat.
Qazirgi ýaqytta korporatsııanyń qorynda 3,3 mln. tonna astyq bar ekendigin tilge tıek etken B. Qabdyrahmanov, «eger naryqta bundaı oqıǵa qaıtalanatyn bolsa, bizdiń jumysymyz áldeqaıda uıymdasqan bolady jáne nan baǵasynyń sharyqtaýynyń aldyn alamyz», dep sendirdi.
Onyń aıtýynsha, bul astyq eldiń ishki suranysyn qamtamasyz etip, baǵanyń ósimine jol bermeýge múmkindik bermek.
Ótken aptada Úkimettiń selektorlyq otyrysynda Aýyl sharýashylyǵy mınıstri Aqylbek Kúrishbaev ta Qazaqstanda 2007 jylǵy jaǵdaıdyń oryn alatynyna kúmán keltirgen.
«Elimizde 6,3 mln. tonna azyq-túliktik bıdaı bar. Elevatorlarda 5,6 mln. tonna astyq saqtalyp tur, onyń 3,6 mln. tonnasy Azyq-túlik korporatsııasynyń astyǵy. Eger biz bıyl tipti pessımıstik boljam boıynsha 15 mln. tonna astyq jınaıtyn bolsaq, onda tutastaı alǵanda, marketıngtik jyldyń basynda saqtaýly turǵan qordy qosqanda, elimizde 22 mln. tonna astyq bolady. Bul bizdiń ishki suranysty qamtamasyz ete alatynymyzdy bildiredi. Elimiz nannan tarshylyq kórmeıtin bolady», dedi otyrys barysynda A. Kúrishbaev.
