Nan baǵasyn turaqtandyrý: Almatyǵa 29,8 myń tonnadan astam astyq jetkiziledi

ALMATY. QazAqparat - Azyq-túlik qaýipsizdigin qamtamasyz etý jáne áleýmettik nan baǵasynyń kóterilýine jol bermeý maqsatynda Almaty qalasynyń ákimdigi Aýyl sharýashylyǵy mınıstrligi, «Azyq-túlik kelisimshart korporatsııasy» UK» aktsıonerlik qoǵamymen 1 surypty bıdaı unynan pisiriletin qalypty nannyń (áleýmettik) baǵasyn turaqtandyrý jónindegi Memorandýmǵa qol qoıdy, dep habarlaıdy QazAqparat tilshisi.

Qalalyq ákimdiktiń málimetine sáıkes, kelisim QR «Agroónerkásip keshenin jáne aýyldyq aýmaqtardy damytýdy memlekettik retteý týraly» Zańǵa sáıkes qoldanylady. Memorandým aıasynda Azyq-túlik korporatsııasy 1 surypty un shyǵarý úshin Almatynyń un tartatyn dıirmeni bar uıymdaryna azyq- túlik bıdaıynyń bir tonnasy úshin 90 myń teńge bolyp bekitilgen baǵa boıynsha jetkizýdi qamtamasyz etedi.

«Azyq-túlik korporatsııasynyń barlyq qorynan 2022 jyldyń naýryz aıynan bastap, tamyz aıyn qosa alǵandaǵy kezeńde Almatyǵa shamamen 2,7 mlrd teńge jalpy somasyna 29,8 myń tonnadan astam astyq jetkizý josparlanyp otyr. Kelisim ári qaraı uzartý múmkindigimen 2022 jylǵy tamyz aıyna (qosa alǵanda) deıingi merzimde qoldanylady. Megapolıstiń astyqqa degen aılyq tutyný qajettiligi 4 261,1 tonnany quraıdy.

Shıkizatpen qamtamasyz etý qalanyń negizgi nan-toqash kombınattaryna áleýmettik nannyń baǵasyn burynǵy deńgeıde saqtap qalýǵa múmkindik beredi»,- delinedi ákimdik habarlamasynda.