Nan baǵasy óspeıdi: Qazaqstanda 0,5 mıllıon tonna arzandatylǵan bıdaı bólindi

ASTANA. QazAqparat - Búgin QR Aýyl sharýashylyq mınıstrliginde Azyq-túlik kelisimshart korporatsııasynyń jáne ókiletti organdardyń qatysýymen 1-surypty un baǵasyn turaqtandyrý jónindegi memorandýmǵa qol qoıyldy.

Memorandým sheńberinde Azyq-túlik kelisimshart korporatsııasy resýrsynan 500 myń tonna arzandatylǵan bıdaı bólinbek. Bıdaı jergilikti atqarýshy organdarymen anyqtalǵan un tartýshy kásiporyndaryna tonnasyna 30 myń teńge belgilengen baǵamen beriledi. Bıdaı 2014 jyldyń tamyz aıyna deıin jetkizilip turmaq.

«Tonnasyna 30 myń teńge devalvatsııaǵa deıin bolǵan baǵa. Sondyqtan biz osy baǵamen jiberetin bolamyz. Qazirgi ýaqytta jeke kásipkerler 35 myń teńge jáne odan da joǵary baǵamen satylýda. Menińshe, 30 myń teńge nan baǵasyn ustap turýǵa septigin tıgizedi», - dedi «Azyq-túlik kelisimshart korporatsııasy» AQ basqarma tóraǵasynyń orynbasary Jalelıden Smaǵulov.

Onyń aıtýynsha, osyndaı kelisimder barlyq oblys ákimdikteri arasynda jasalady.