«Namystaný degen sóz ózge ulys ókilderine dúrse qoıý degendi bildirmeıdi» - respýblıkalyq basylymdarǵa sholý
***
«Keshe Pavlodarda Qazaqstan Prezıdenti Nursultan Nazarbaev jáne Reseı Prezıdenti Vladımır Pýtınniń qatysýymen eki eldiń ІH aımaqaralyq yntymaqtastyq forýmy ótti», - dep jazady «Egemen Qazaqstan» gazeti. Forým barysynda sóz sóılegen Elbasy: «Birtutas ekonomıkalyq keńistikke birige otyryp, biz kásiporyndar úshin kedergilerdi alyp tastadyq. Endi tıimdi óńiraralyq ındýstrııalyq klasterdi ornyqtyrý kerek. Oǵan tabysty mysaldyń biri - Shyǵys Qazaqstan oblysynda avtomobıl óndirisiniń qurylýy. Bul aýqymdy jobaǵa salynǵan ınvestıtsııa kólemi - 400 mıllıon dollar, jobalyq qýaty - 5,7 mıllıard dollar», - dedi. Maqala «Qazaqstan-Reseı: Yntymaqtastyq - yrys bastaýy» degen taqyryppen jaryq kórdi.
***
Zeınetke shyǵar jasty ósirip, áıelderdi erlermen teńestirý jaıyndaǵy áńgime qoǵamdy qatty tolqytýda. Bılik basyndaǵylardyń ashyp aıtpasa da, oıyndaǵysyn oqtyn-oqtyn laýazymdy áıelderdiń aýzyna salyp, jurttan syr tartqysy keletini de baıqalady. Mine osy jaıt arqaý bolǵan maqala «Aıqyn» gazetiniń búgingi sanynda «Áıelderdiń esebinen qor jumysy kúsheıe me?» degen taqyryppen berilgen. «Mundaı reformalar ne úshin qajet bolýda? Bul kimniń múddesi úshin jasalmaqshy: halyqtyń ba, álde memlekettik bıýdjettiń be? Eger bul membıýdjettiń múddesi úshin jasalatyn bolsa, onda naqty qansha qarajat únemdeledi? Naqty tsıfrlarmen kórsetilsin. Qazaqstandyq áıelder muny bilýge quqyly dep oılaımyz», - dep jazady basylym.
«Aıqyn» gazetiniń jazýynsha, adamzattyń ajaly neden degen suraqqa jaýap izdegen ǵalymdardyń bir toby jer sharynyń jylynýynan topan sý basý qaýpi ulǵaıǵanyn aıtsa, endi bireýler aspannan ózge planetalar jerdiń kúl-talqanyn shyǵaratyndyǵyn sóz etip, kúdikti kún saıyn ulǵaıtýda. Biraq osynyń barlyǵy da ádire qalyp, adamǵa qaýip basqa nárseden tónetin sekildi. Bul týraly reseılik ǵalymdar alańdaýǵa negiz bolar aqparattar taratyp, eń bastysy, osy qaýiptiń aldyn alýǵa shaqyrýda. Munan da ózge sebepterin basylymniń búgingi nómirindegi «Adamzattyń ajaly neden?» degen taqyryptaǵy mqaladan bile alasyzdar.
***
«Alash aınasy» gazetiniń turaqty «Dat!» aıdarynda A.Baıtursynulynyń murajaı-úıiniń janyndaǵy ǵylymı keńestiń múshesi Sabyrjan Shúkirulymen aradaǵy suhbat «Namystaný degen sóz ózge ulys ókilderine dúrse qoıý degendi bildirmeıdi» degen taqyryppen berilgen. Basylym tilshisiniń barlyq saýalyna tuşymdy jaýap bergen ol: «Búgingi qazaqqa kiná qoıý qıyn. Oǵan júregimde de daýalamaıdy. Biraq qoǵamdyq formatsııa ózgergen kezde halyq pen bıliktiń arajigi ajyrap qaldy. Osy másele ornyna kelse, óte oryndy bolar edi. Sodan keıin bizdiń áli ulttyq namysymyz oıana qoımaǵan, sol meni qynjyltady. Otbasylyq, rýlyq namysy tutas ulttyq namysqa ulassa», - deıdi.
***
«Elimizdegi sottalǵan jasóspirimderdiń jalǵyz kolonııasynan bir top jazasyn óteýshi qashyp ketpek boldy. Al osy mekemege jaýapty basshylar olardyń der kezinde joldaryn bógep toqtatqanyna shúkirshilik aıtyp, bar kináni ǵımarattyń kóneliginen kórip otyr», - dep jazady «Alash aınasy» gazeti búgingi sanynda «Jer astynan jik shyǵa jazdady» degen taqyryptaǵy materıalynda. Basylymnyń atap ótýinshe, 18 qyrkúıek kúni túngi saǵat 23:00 shamasynda Almaty qalasynda jasóspirimder kolonııasynan bir top sottalǵandar qashyp ketýge áreket jasaǵan. Olar bıiktigi eki, uzyndyǵy tórt metr jerdi qazyp úlgergen. Uıymdastyrýshylardyń, qansha adamnyń qashyp ketpek bolǵandyǵy ázirshe qupııa bolyp otyr.
