Namıbııanyń birinshi prezıdenti Sem Nýıoma kóz jumdy

ASTANA.KAZINFORM  -  Namıbııanyń birinshi prezıdenti Sem Nýıoma senbi, 8 aqpanda qaıtys boldy. Ol 95 jasta edi. Sońǵy úsh aptasyn densaýlyǵyna baılanysty aýrýhanada ótkizdi, dep habarlaıdy Sınhýa agenttigi.

Bul týraly el prezıdenti Nangolo Mbýmba jeksenbi kúni tańerteń jasaǵan málimdemesinde aıtqan.

Nangolo Mbýmba eldiń birinshi prezıdenti densaýlyǵynyń nasharlyǵyna baılanysty sońǵy úsh aptada emdelýge jáne baqylaýǵa alý úshin el astanasy Vındhýkte aýrýhanaǵa jatqyzylǵanyn atap ótti.

– Ókinishke qaraı, elimizdiń eń qaısar perzenti bul joly dertinen aıyǵa almady. Sondyqtan men búgin tańerteń, 2025 jyldyń 9 aqpanynda Namıbııa halqyna, afrıkalyq baýyrlastarymyzǵa jáne búkil álemge qurmetti bostandyq úshin kúresker jáne revolıýtsııalyq kóshbasshy, mártebeli doktor Sem Shafııshýna Nýjomanyń qaıtys bolǵanyn úlken qaıǵymen habarlaımyn. Prezıdent Nýıoma 8 aqpanda 23:45-te Namıbııanyń Vındhýk qalasynda 95 jasynda qaıtys boldy, - dedi ol.

1929 jyly 12 mamyrda Namıbııanyń soltústik-batysynda Omýsatı aımaǵyndaǵy Etýnda aýylynda dúnıege kelgen Sem Nýıoma eldiń tuńǵysh prezıdenti (1990-2005) boldy. Ol, sonymen qatar Namıbııany táýelsizdik alǵannan beri basqaryp kele jatqan Ońtústik-Batys Afrıka halyqtyq uıymynyń negizin qalaýshy.

Áleýmettik jelide Sem Nýjomanyń otbasyna kóńil aıtqan Nangolo Mbýmba onyń úkimeti jerleý rásimin uıymdastyryp, negizin qalaýshy prezıdentti eske alý úshin ulttyq aza tutý kezeńin jarııalaıtynyn aıtty.

Buǵan deıin Ońtústik Afrıkadaǵy Stılfonteın shahtasynan 78 zańsyz kenshiniń denesi tabyldy.