Namıbııalyq saıasatker Adolf Gıtler saılaýda jeńiske jetti

ASTANA. KAZINFORM — Namıbııalyq saıasatker Adolf Ýýnona Ompýndıa okrýginde besinshi ret qatarynan saılaýda jeńiske jetip, 89,6% daýys jınady. Ol jetekshilik qyzmetin jalǵastyrady, dep habarlaıdy BILD basylymy.

Buǵan deıin Ýýnona ákesi bala kezinde qoıǵan «Gıtler» degen ekinshi atynan bas tartqan. Saıasatker bul esim tek qıyndyq ákelgenin aıtady. Ol esimin ózgertý týraly sheshimdi sońǵy saılaý naýqany kezinde qabyldaǵan. 

Sheneýnik Namıbııa habar taratý korporatsııasyna bergen suhbatynda árdaıym Germanııamen jáne onyń burynǵy basshysymen eshqandaı baılanysy joq ekenin aıtýdan sharshaǵan.

Ýýnonanyń aıtýynsha, buqaralyq aqparat quraldary onyń burynǵy aty jónin paıdalanyp, sáıkes sýretteri bar materıaldardy jarııalaýy sensatsııaǵa negizdelgen.

— Eshkimniń meni saıası josparlaryma kedergi keltiretin esimmen baılanystyrǵanyn qalamaımyn, — dedi saıasatker.

Namıbııada aty jónińdi ózgertý óte kúrdeli jumys. Bul dáleldi sebepterdi, biraz qujatty, eki gazette kúndelikti jarnama jáne úkimettiń resmı basylymynda habarlandyrý jarııalaýdy qajet etedi.

Adolf Gıtler Ýýnona bul okrýgti 2004 jyldan beri basqaryp keledi. Ol 2020 jyly shamamen 85 paıyz daýyspen qaıta saılanǵan.