Namıbııalyq saıasatker Adolf Gıtler esiminen bas tartyp, tólqujatyn ózgertti

ASTANA. KAZINFORM — Namıbııadaǵy Ompýndıa okrýginiń jetekshisi Adolf Gıtler Ýýnona óziniń tólqujatyndaǵy atyn ózgertti, dep habarlaıdy BILD.

Endi onyń resmı aty — Adolf Ýýnona. Bul sheshimdi ol óńirdegi tórtinshi saılaýǵa qatysýyna baılanysty qabyldaǵan. Kezinde Germanııanyń otary bolǵan bul óńirde saıasatkerdiń erekshe aty onyń bedeline kedergi keltirgen edi.

Ýýnonanyń sózinshe, balalyq shaǵynda «Adolf Gıtler» aty oǵan qalypty kóringen, biraq keıin ol osy attyń tarıhı mańyzyn túsingen.

— Balalyqta bul jaı ǵana ádettegi at sııaqty kóringen. Keıin baryp, bul adamnyń búkil álemdi jaýlaýǵa tyrysqanyn túsindim. Meniń munyń bárine esh qatysym joq. Men jahandyq bılikke talpynbaımyn, — dedi ol.

Saıasatker sondaı-aq aınalasyndaǵylar ony tek Adolf dep ataǵanyn atap ótti:

— Áıelim meni Adolf dep ataıdy. Ekinshi at tek resmı qujattarda qoldanylǵan. Endi odan tolyq bas tarttym, — dedi Ýýnona.

Namıbııada at ózgertý protsedýrasy kúrdeli sanalady: ol mańyzdy sebepterdi, qujattardyń úlken paketin, eki gazette habarlandyrý jarııalaýdy jáne resmı úkimettik basylymda habarlandyrý ornalastyrýdy talap etedi. Ýýnona barlyq talaptardy oryndaǵan.

Buryn habarlanǵandaı, Adolf Gıtler Ýýnona okrýgti 2004 jyldan beri basqaryp keledi, al 2020 jyly ony basshylyqqa qaıta saılap, shamamen 85 paıyz daýys jınaǵan.

Aıta keteıik, buǵan deıin Namıbııada Adolf Gıtler esimdi sheneýnik óńirlik saılaýǵa qatysyp jatqanyn jazdyq.