Nálibaev: Sý únemdeý tehnologııalaryna bólingen qarjyny tıimdi ıgerý qajet
QYZYLORDA. KAZINFORM — Búgin oblys ákimi Nurlybek Nálibaevtyń tóraǵalyǵymen Memleket basshysynyń Joldaýynan týyndaıtyn mindetterdi júzege asyrý máselelerine arnalǵan jıyn ótti, dep habarlaıdy Qyzylorda oblysy ákiminiń baspasóz qyzmeti.
Oǵan quqyq qorǵaý organdarynyń, basqarmalar men aýmaqtyq departamentterdiń basshylary, máslıhat depýtattary, saıası partııalar, úkimettik emes uıymdar, zııaly qaýym ókilderi, jastar, onlaın baılanys arqyly Qyzylorda qalasy men barlyq aýdan ákimderi qatysty.
Aımaq basshysy Joldaýda kórsetilgen jeti baǵyt boıynsha tapsyrmalar júktedi.
— Memleket basshymyz ekonomıkanyń salalaryn jańǵyrtý úshin tsıfrlandyrý men jasandy ıntellekt tehnologııasyn jedeldetip engizý máselelerine erekshe toqtaldy. Jasandy ıntellektiniń múmkindikterin qoldanyp, elimizdi odan ári órkendetýdiń, áleýmettik-ekonomıkalyq, ınnovatsııalyq damytýdyń jańa baǵdary aıqyndaldy. Jappaı tsıfrlandyrý arqyly otandyq ekonomıkany ártaraptandyrý, keshendi túrde jańǵyrtý kózdelgen. Aldaǵy úsh jylda Qazaqstandy tsıfrlyq elge aınaldyrý maqsatynda naqty strategııalyq mejelerdi belgiledi. Óńirge ınvestıtsııa tartý jumystary tek kásipkerlik jáne ónerkásip basqarmasymen ǵana shektelip qalmaýy qajet. Qala, aýdan ákimdikteri men árbir basqarma óz salalary boıynsha qarqyndy jumys jasaýy tıis. Oblystyq kásipkerlik jáne ónerkásip basqarmasy 2026 jylǵa negizgi kapıtalǵa salynatyn ınvestıtsııa kólemin bekitý úshin usynys berińizder. Investorlarǵa qolaıly jaǵdaı jasaýda arnaıy ekonomıkalyq aımaqtyń mańyzy zor. Jańadan qolǵa alynǵan jobalardy kúndelikti baqylaýda ustap, súıemeldeý qajet. 2025-2027 jyldarǵa arnalǵan agroónerkásip keshenine ınvestıtsııa tartý jol kartasyna engizilgen jobalardyń ýaqytyly júzege asyrylýyn qamtamasyz etińizder. Aýyl sharýashylyǵy maqsatyndaǵy jerlerdi memleket menshigine qaıtarýda oblysqa bekitilgen mejeni 100 paıyz oryndaý qajet. Sý resýrstarynyń biryńǵaı platformasyn jasaý jumystaryn pysyqtańyzdar. Sý únemdeý tehnologııalaryn qoldanýdy ulǵaıtýǵa bólingen qarjyny maqsatty, merziminde ıgerýdi tapsyramyn. Oblys aýmaǵynan ótetin jol qurylysy jumystarynyń ýaqytyly bastalýyn baqylaýǵa alyńyzdar. Salynyp jatqan, aldaǵy ýaqytta salynatyn nysandardyń qurylysyn «E-Qurylys» aqparattyq platformasy arqyly júrgizý kerek. Túrli qarjy ınstıtýttary arqyly jobalardy súıemeldeý, iri kásiporyndar aınalasynda shaǵyn jáne orta kásiporyndardy damytýdy jalǵastyrý — óte mańyzdy jumys. Joldaýda aıtylǵan máselelerdiń biri — memlekettiń ekonomıkadaǵy úlesin azaıtý. Bul oraıda naqty usynystar engizińizder. Memleket basshymyz Joldaýda áleýmettik kómekti tek shyn muqtajdarǵa baǵyttaýdy tapsyrdy. Bul jumystardy zań aıasynda jalǵastyrýdy tapsyramyn, — dedi N.Nálibaev.
Jıynda patrıotızm uǵymynyń jańa sıpaty, jastar úshin jasampazdyq pen jańashyldyqty otanshyldyqtyń basty kórsetkishine aınaldyrý týraly Senatorlar keńesiniń múshesi, Qyzylorda oblysynyń qurmetti azamaty Murat Baqtııaruly, óńirge ınvestıtsııa tartý jaıynda oblys ákiminiń orynbasary Ardaq Zebeshev, sý máselesin sheshýde atqarylǵan jumystar týraly Y. Jaqaev atyndaǵy Qazaq kúrish ǵylymı-zertteý ınstıtýtynyń dırektory Sultanbek Táýipbaev sóz sóıledi.
Sondaı-aq, «Abzal ı K» JShS kommertsııalyq dırektory Saǵıdýlla Syzdyqov agroónerkásip salasyn, agrohabtardy damytý, salany tsıfrlandyrý, ónimderdi tereń óńdeý týraly, Qorqyt Ata atyndaǵy Qyzylorda ýnıversıteti rektorynyń mindetin atqarýshy Maınur Bóribaeva tsıfrlandyrý, jasandy ıntellekt baǵytyndaǵy jumystar men mindetter týraly baıandama jasady.
Ulttyq dástúrlerdi dáripteý, jastardy rýhanı qoldap, baǵyt-baǵdar berý jaıynda «Qoǵam TV» telearnasynyń quryltaıshysy, Qazaqstan Jazýshylar jáne Jýrnalıster odaǵynyń múshesi Shakızada Ábdikárimov óz oıyn ortaǵa saldy.