Nálibaev Qostanaı oblysyndaǵy iri jobalardyń júzege asyrylý barysymen tanysty
QOSTANAI. KAZINFORM – QR Premer-mınıstriniń birinshi orynbasary Nurlybek Nálibaev Qostanaı oblysyna jumys saparymen baryp, óńirdegi ındýstrıaldy jáne agrarlyq sektordyń damý qarqynyn, iri óndiristik jáne ınfraqurylymdyq jobalardy júzege asyrý barysyn tekserdi.
Sapar barysynda áleýmettik-ekonomıkalyq damý kórsetkishteri taldanyp, aldaǵy kezeńge arnalǵan mindetter aıqyndaldy.
Aldymen birinshi vıtse-premer KIA Qazaqstan avtomobıl zaýytynyń jumysymen tanysty. Jylyna 70 myń avtokólik shyǵarýǵa qaýqarly kásiporyn $310 mln kólemindegi ınvestıtsııa esebinen salynǵan. Munda 1500-ge deıin jumys orny qarastyrylǵan.
Búginde zaýytta óndiris tolyq avtomattandyrylǵan, robottandyrylǵan júıeler keńinen engizilgen. Kásiporynda 800-ge jýyq adam eńbek etedi. Jyl basynan beri shamamen 7 myń avtokólik shyǵarylyp, ishki naryqty qamtamasyz etý jáne eksporttyq áleýetti arttyrý baǵytynda júıeli jumys júrgizilýde.
Sapar barysynda delegatsııa «Tobyl» kólik-logıstıkalyq kesheniniń qurylysymen tanysty. Jalpy quny 64 mlrd teńgege jýyq iri ınfraqurylymdyq joba óńirdiń tranzıttik áleýetin arttyrýǵa baǵyttalǵan.
Joba tolyq iske qosylǵan jaǵdaıda 500 jańa jumys orny ashylyp, konteınerlik tasymal kólemi 20%-ǵa deıin ulǵaıady. Qazirgi tańda alǵashqy kezeń aıasynda 2 723,7 metr temirjol jelisi men 26 myń sharshy metr konteınerlik alań salyndy. Joba 2027 jyly tolyq aıaqtalýy josparlanǵan.
«Keshen iske qosylǵannan keıin Qostanaı oblysynyń tranzıttik jáne logıstıkalyq áleýetin edáýir arttyryp, halyqaralyq júk tasymaly baǵytyndaǵy mańyzdy habtardyń birine aınalady dep kútilýde. Bul óz kezeginde óńir ekonomıkasynyń damýyna, jańa jumys oryndarynyń qurylýyna jáne ınvestıtsııalyq tartymdylyqtyń artýyna oń áserin tıgizedi», — dedi «Tobyl» KLK» JShS dırektory Aıdyn Álimov.
Delegatsııa sondaı-aq ındýstrıaldy aımaqta ornalasqan «KamLitKZ» zaýytynyń qyzmetimen tanysty. Kásiporyn aýyr júk kólikterine arnalǵan avtokomponentter shyǵarady. Buǵan deıin iske qosylǵan jobalardyń biri – shoıyn quıý óndirisi. Byltyr zaýytta 654 myń tonna ónim óndirilip, onyń basym bóligi eksportqa jóneltilgen.
Delegatsııaǵa óńirde júzege asyrylýy josparlanǵan gaz-hımııa kesheni men Aqtóbe – Qostanaı magıstraldyq gaz qubyrynyń qurylysy jónindegi jobalar tanystyryldy.
Sonymen qatar «Baıan Sulý» fabrıkasynyń «Kondıterlik astana» jobasy tanystyryldy. Jańa óndiristik keshen jylyna 13 myń tonnaǵa deıin kondıterlik ónim shyǵarýǵa múmkindik beredi. Kásiporynda 260 jańa jumys orny ashylǵan.
«Jańa keshen ishki naryqtaǵy suranysty qamtamasyz etip qana qoımaı, eksporttyq áleýetti keńeıtýge, ónim túrlerin kóbeıtýge jáne halyqaralyq naryqtardaǵy pozıtsııamyzdy nyǵaıtýǵa serpin beredi. Jobany belgilengen merzimde aıaqtap, jańa óndiristi iske qosý baǵytynda júıeli jumystar atqarylyp jatyr», — dep baıandady «Baıan Sulý» AQ basqarma tóraǵasy Tımýr Sadyqov.
Sapar aıasynda óńirdiń ınvestıtsııalyq áleýetin arttyrýǵa baǵyttalǵan eki iri joba usynyldy. Olar – astyqty tereń óńdeý zaýyty men turaqty avıatsııalyq otyn (SAF) óndirý zaýyty.
Birinshi vıtse-premer birqatar ınfraqurylymdyq nysandardy da aralady. Atap aıtqanda, temirjol vokzalynyń qaıta jańǵyrtý jumystary (joba quny 5,3 mlrd teńge, daıyndyq deńgeıi 57%) jáne táýligine 1400-den astam jolaýshy qabyldaıtyn nysannyń jańartý barysy qaraldy.
Sondaı-aq Arqalyq áýejaıyn qalpyna keltirý jobasy tanystyryldy. Jańa jolaýshylar termınalynyń qurylysy 80%-ǵa aıaqtalǵan, onyń jalpy aýdany shamamen 3 myń sharshy metrdi quraıdy.
«Arqalyq qalasynda jańadan boı kóterip jatqan iri ǵımarattardyń biri osy bolady. Áýejaı Memleket basshysynyń tikeleı tapsyrmasymen salynyp jatyr. Sondyqtan jumysty belgilengen merzimde ǵana emes, joǵary sapamen aıaqtaý qajet», — dedi Premer-mınıstrdiń birinshi orynbasary Nurlybek Nálibaev.
Budan bólek, «Ortalyq – Batys» kólik dálizin damytý, sondaı-aq strategııalyq mańyzy bar kólik ınfraqurylymyn jańǵyrtý jobalary qaraldy.
Tobyl qalasyndaǵy «Astana» shaǵyn aýdanynda josparǵa sáıkes 154 kópqabatty turǵyn úı salý kózdelgen. Búginde 10 úıdiń qurylysy aıaqtalǵan, taǵy 13 úı aǵymdaǵy jyly paıdalanýǵa beriledi.
Sapar qorytyndysynda Premer-mınıstrdiń birinshi orynbasary birqatar naqty tapsyrmalar berdi. Olardyń qatarynda ınvestıtsııalyq jobalardy qoldaý jáne eksporttyq áleýetti keńeıtý; ındýstrııalyq aımaq ınfraqurylymyn damytý; «Tobyl» logıstıkalyq keshenin qarjylandyrýdy jedeldetý; aýyl sharýashylyǵy ónimderin tereń óńdeý jobalaryn júzege asyrý; turǵyn úı qurylysyn jedeldetý jáne sapasyn baqylaý; jylytý maýsymyna daıyndyq jumystaryn kúsheıtý máseleleri bar.
Sonymen qatar energetıka, kólik jáne kommýnaldyq ınfraqurylym salalaryndaǵy strategııalyq jobalardy ýaqytyly aıaqtaý mindetteldi.
Aıta keteıik, Qostanaı soty qoqys shyǵarý tarıfin qaıta esepteý týraly aryzdy maquldamady.
