Nálibaev Almaty-1 vokzalyndaǵy jumysty tez arada aıaqtaýdy tapsyrdy
ASTANA. KAZINFORM — Premer-mınıstrdiń birinshi orynbasary Nurlybek Nálibaev Almaty qalasyna jumys sapary barysynda megapolıstiń negizgi kólik-logıstıkalyq, energetıkalyq, ındýstrııalyq jáne týrıstik nysandaryn aralady. «Almaty-1» vokzalyna barǵan Premer-mınıstrdiń birinshi orynbasary byltyr naýryz aıynda bastalǵan rekonstrýktsııalaý jumysynyń barysyn tekserdi. Bul týraly Úkimettiń baspasóz qyzmeti habarlady.
Joba-smetalyq qujattamany memlekettik saraptama portalyna júkteý aıaqtalǵany týraly málimet berildi, biraq uıǵarym alý 2026 jyldyń 11 tamyzyna qalǵan.
— Úkimet basshysynyń Almaty-1 vokzalyndaǵy jańǵyrtýdyń barysyn kórý tapsyrmasymen kelgende, «Qazaqstan Temir jolynyń» jumysyndaǵy kemshilikterdi baıqadyq. Vokzalǵa jaz mezgilinde táýligine 12 myń, al qysta 7 myńǵa jýyq jolaýshy kelip-ketedi. Qazir olarǵa jyl on eki aı qolaısyz jaǵdaı týyndaǵan. Josparlanǵan jumys sońyna jetpeı, jolaýshylar qıyndyq kórýde. Alyp shaharda ornalasqan asa mańyzdy nysandaǵy jumys qarqyny múldem syn kótermeıdi. Jazǵy demalys maýsymy bastalatyn ýaqyt boldy. Sondyqtan jumysty jedeldetý kerek.
Elimizdiń tarıhynda bir mezette 121 vokzaldy jańǵyrtý jumystary buryn-sońdy bolmaǵan. Memleket basshysynyń arnaıy tapsyrmasymen qolǵa alynǵan osy mańyzdy jobany sapaly ári ýaqytyly júzege asyrý kerek. «Qazaqstan Temir joly» basshylyǵyna Almaty-1 vokzalyndaǵy jumysty tez arada aıaqtaýdy tapsyramyn. Qala ákimdigi jumys barysyn, qarqynyn kúndelikti qadaǵalaýy kerek. Bul másele Úkimettiń qatań baqylaýynda, — dedi Premer-mınıstrdiń birinshi orynbasary.
Birinshi vıtse-premer merdiger kompanııaǵa joba-smetalyq qujattamany saraptamadan ótkizý isin jedeldetýdi, jabdyqtardy der kezinde jetkizýdi, qala ákimdigine barlyq jumysty baqylaýdy tapsyrdy.
Sondaı-aq Premer-mınıstrdiń birinshi orynbasary Úlken Almaty aınalma avtojolyna qatysty máselelerge de nazar aýdardy. Almaty qalasy jol ınfraqurylymyn damytý basqarmasynyń basshysy Oljas Shabdanov trassaǵa 6 jerden radıaldy joldardy ákelip qosýdyń qurylys-montajdaý jumystary barysyn baıandady. Bul oraıda qajetti jer telimderin satyp alý jáne bosatýǵa qatysty máseleler bar. Mysaly, Sabataev kóshesine deıingi aýmaqta 410 jer teliminiń tek 118-i ǵana satyp alynǵan. Al Aqyn Sara kóshesiniń boıyndaǵy 66 jer telimi túgel memleket menshigine alynǵanymen, jylytý maýsymy kezinde joǵary kerneýli elektr jelisin sóndirý múmkin bolmaǵandyqtan, 110 kV tirek-baǵandardy demontajdaý keıinge qaldyrylǵan. Bul ýchaskede jumystar bıylǵy tamyz aıynda aıaqtalady dep josparlanǵan. Ózge radıaldy joldar boıynsha da jumys jalǵasýda.
Máselen, Almaty qalasy men oblysy arasyndaǵy ýchaskelerde jumysty báseńdetpeý úshin oblysqa qarasty aýmaqta jer telimderin satyp alý, joldyń jobalaý qujattaryn ázirleý jáne qurylys jumystaryn júrgizýge qala bıýdjetinen qarjy bólingeni aıtyldy. Osy oraıda shahardaǵy jol-kólik júıesin damytýǵa qatysty Memleket basshysynyń arnaıy tapsyrmasy bar ekenin eskerip, Almatynyń úlken aınalma kúre jolyndaǵy qurylys jumystaryn jedeldetý týraly tapsyrma berildi.
Aıta ketelik Nurlybek Nálibaev Almaty áýejaıyn jańǵyrtý qarqynyn synǵa alǵan edi.
