Nálibaev Abaı oblysyndaǵy ınfraqurylymdyq jobalardyń júzege asyrylý barysymen tanysty
SEMEI. KAZINFORM — Premer-mınıstrdiń birinshi orynbasary Nurlybek Nálibaev Úkimet jetekshisiniń tapsyrmasymen Abaı oblysyna jumys saparymen bardy. Bul týraly Úkimettiń baspasóz qyzmeti habarlady.
Memleket basshysy Qasym-Jomart Kemelulynyń qoldaýymen óńirlerde iri óndiris oryndaryna ınvestıtsııa tartylyp, áleýmettik, ınjenerlik-kommýnaldyq ınfraqurylym jańǵyrtylýda. Atalǵan jobalardyń júzege asyrylýy, ár kezeńde atqarylǵan jumys barysy Premer-mınıstrdiń jiti baqylaýynda.
Nurlybek Nálibaev elimizdiń taý-ken óndirý salasyndaǵy eń iri ınvestıtsııalyq jobalardyń biri – Aıagóz aýdanyndaǵy «Aıdarly» taý-ken baıytý kombınatynyń irgetasyn qalaý rásimine qatysty.
Keshenniń qurylysyn «Aidarly Mining» JShS júzege asyrýda. Óndiris alańynda ashyq kenish, usaqtaý kesheni, baıytý fabrıkasy, sondaı-aq energetıkalyq, kólik jáne ınjenerlik ınfraqurylym nysandary boı kóteredi. Bul jobanyń otandyq taý-ken metallýrgııa salasyn damytýdaǵy jáne óńir ekonomıkasyn ártaraptandyrýdaǵy strategııalyq mańyzy zor. Jaýapty tulǵalarǵa qurylysty bekitilgen kestege sáıkes júrgizý, ınvestıtsııalyq mindettemelerdi ýaqtyly oryndaý jáne óndiristi belgilengen merzimde iske qosý tapsyryldy.
Odan keıin Besqaraǵaı aýdanyndaǵy «Semeı ormany» memlekettik orman tabıǵı rezervaty Kanonerka fılıalynyń orman tuqymbaǵy men orman tuqym stansasy keshenine bardy.
Ertis boıyndaǵy órtengen orman alqaptaryn qysqa merzimde qalpyna keltirý maqsatynda 2016 jyly iske qosylǵan keshen Qazaqstandaǵy ǵana emes, Ortalyq Azııadaǵy orman kóshetterin jabyq tamyr júıesimen ósiretin alǵashqy ári biregeı óndiris orny sanalady.
Innovatsııalyq tehnologııanyń arqasynda qaraǵaı kóshetterin ósirý merzimi eki jyldan bir jylǵa deıin qysqaryp, tuqymnyń óngishtigi 95%-ǵa deıin jetken. Osy nysanda orman qoryn ulǵaıtý, órt qaýipsizdigin qamtamasyz etý jáne ormandy qalpyna keltirý jumystaryn júıeli jalǵastyrýǵa qatysty tapsyrma berildi.
Jumys sapary barysynda Semeıdegi jylý nysandary nazardan tys qalǵan joq. Oblys ortalyǵyndaǵy TETs-1 kásipornynyń óndiristik qyzmeti jáne aldaǵy jylý berý maýsymyna daıyndyq barysy týraly baıandaldy.
Kásiporyn 2026–2027 jylǵy jylytý maýsymyna daıyndyq aıasynda 26 jobany júzege asyrýdy josparlaǵan. Tolyq aıaqtalǵannan keıin oblystaǵy jylý jelileriniń tozý deńgeıi 55,6%-dan 52,3%-ǵa deıin, onyń ishinde Semeı qalasynda 58,2%-dan 54,1%-ǵa deıin tómendeıdi dep kútilýde.
Memleket basshysynyń tapsyrmasymen salynyp jatqan Semeı qalasyndaǵy avtomobıl kópiriniń qurylys-montaj jumystary 70%-ǵa oryndalǵan. Kópir tórt jolaqty qozǵalysqa eseptelgen. Qurylysty aıaqtaý úshin arnaýly memlekettik qordan qarajat bólingen. Kólik ótkeliniń strategııalyq mańyzy zor. Sondyqtan bólingen qarajatty tıimdi ıgerý jáne kópir arqyly kólik qozǵalysyn belgilengen kestege sáıkes qamtamasyz etý tapsyryldy.
Osy saparda Semeıdiń Qaraǵaıly turǵyn aýdanyndaǵy 13 kóppáterli turǵyn úı qurylysy, Semeı temirjol vokzalyn rekonstrýktsııalaý barysy da basty nazarda boldy. Vokzaldy jańǵyrtý aıaqtalǵan soń jalpy aýmaǵy 3 myńnan 4,7 myń sharshy metrge deıin ulǵaıyp, 143 metr jaıaý júrginshiler ótkeli paıdalanýǵa beriledi. Nysandaǵy jumys eki aýysymmen júrgizilýde, jóndeý kezeńinde jolaýshylarǵa qyzmet kórsetý úshin ýaqytsha kútý orny uıymdastyrylǵan.
Memleket basshysynyń tapsyrmasymen «Qazaqstan temir joly» ulttyq kompanııasynyń vokzal ınfraqurylymyn jańǵyrtý baǵdarlamasy aıasynda Abaı oblysynda 10 temirjol vokzalyn qaıta jańǵyrtý josparlanǵan. Jýyrda Abaı oblysyndaǵy Borodýlıha aýdanynyń Aýyl jáne Belaǵash temirjol vokzaldary paıdalanýǵa berildi. Óńirdegi segiz vokzalda – Semeı, Aıagóz, Shar, Aqtoǵaı, Jalańashkól, Degeleń, Úshbıik jáne Jarma stansalarynda jańǵyrtý jumystary jalǵasýda.
Sapar qorytyndysynda Premer-mınıstrdiń birinshi orynbasary turǵyn úı qurylysyn, temirjol vokzaldaryn rekonstrýktsııalaý jumystaryn belgilengen merzimde, sapaly etip aıaqtap, nysandardy ýaqtyly paıdalanýǵa berýdi tapsyrdy.
