Naqty ómirde áıelderdiń zorlyq-zombylyqqa ushyraý faktileri quqyq qorǵaý organdaryna belgili deńgeıden edáýir joǵary
ASTANA. QazAqparat - Naqty ómirde áıelderdiń zorlyq-zombylyqqa ushyraý faktileri quqyq qorǵaý organdaryna belgili deńgeıden edáýir joǵary. Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi brıfıngte QR Prezıdenti janyndaǵy Áıelder isteri jáne otbasylyq saıasat jónindegi ulttyq komıssııanyń múshesi, Bas prokýratýranyń Quqyqtyq statıstıka jáne arnaıy esepteýler jónindegi komıtetiniń tóraıymy Sáýle Aıtbaeva aıtty.
«Respýblıkanyń barlyq ishki ister organdarynda áıelderdi zorlyq-zombylyqtan qorǵaý boıynsha arnaıy mamandandyrylǵan bólimsheler jumys isteıdi. Olarǵa ótken jyly 31430 áıel kelip, kómekke júgingen. Mundaı organdar TMD elderiniń basqa memleketterinde joq», - dedi ol.
Onyń aıtýynsha, ótken jyly ǵana polıtsııa qyzmetkerleri 63 myńnan astam jábir kórgenderdi qorǵaýǵa baǵyttalǵan uıǵarym shyǵarǵan. Máselen, osydan bes jyl buryn, ıaǵnı, 2010 jyly ne bári segiz myń ǵana uıǵarym shyǵarylǵan edi.
«Sotpen bes myńnan astam quqyq buzýshynyń tártibine qatysty erekshe talaptar qoıylǵan. Al bes jyl buryn adamdardyń tártibine qatysty erekshe talap bar bolǵany 260 quqyq buzýshylyqqa ǵana qatysty qoıylǵan edi», - dedi
S.Aıtbaevanyń sózine qaraǵanda, 2009 jyly otbasylyq-turmystyq qatynastar salasynda 887 qylmys tirkelse, 2010 jyldyń qorytyndysy boıynsha bul kórsetkish 621 qylmysqa deıin tómendegen.
«Sonymen qatar otbasylyq-turmystyq qatynastar salasynda jasalatyn quqyq buzýshylyqtar men qylmystar jasyryn sıpatty bolady. Demek, naqty ómirdegi zorlyq-zombylyq faktileri quqyq qorǵaý organdary men qoǵamǵa belgili deńgeıden edáýir kóp», - dedi ol.
