Naqty 100 myń teńgege deıin tabysy bar otbasy úshin turǵyn úı satyp alý úlken problema - S. Nokın
ASTANA. 7 jeltoqsan. QazAqparat - Naqty 100 myń teńgege deıin tabysy bar otbasy úshin óz betimen turǵyn úı satyp alý úlken problema.
Parlamentte «Halyqty turǵyn úımen qamtamasyz etýdiń jaı-kúıi men perspektıvalary» atty taqyrypta ótken parlamenttik tyńdaýda QR Qurylys jáne turǵyn úı-kommýnaldyq sharýashylyq isteri agenttiginiń tóraǵasy Serik Nokın osylaı málim etti.
«Búgingi kúni halyqtyń negizgi toby úshin turǵyn úıdiń qoljetimdiligin arttyrý memlekettik turǵyn úı saıasatynyń basym máseleleri bolyp otyr. Osyǵan oraı, «Qoljetimdi baspana» baǵdarlamasynyń jobasyn ázirlegen kezde jumys toby halyqtyń satyp alý suranysynyń, jalaqynyń jáne turǵyn úı baǵasynyń parametrlerin anyqtady», - dedi agenttik basshysy. Onyń aıtýynsha, mysal retinde 4 adamnan turatyn, sonyń ishinde ekeýi jumys isteıtin jáne aıyna 106 myń teńge naqty tabys tabatyn ortasha statıstıkalyq otbasy qarastyrylǵan. «Osy otbasynyń shyǵystary 64 myń teńge somasynda, bir adamǵa aıyna 16 myń teńgeden tıedi. Al páter satyp alý úshin bos lımıt 42 myń teńge (106 - 64 = 42). Alańy 40 sharshy metr páterge aısaıynǵy tólem ıpotekalyq qaryz (15 jyl merzimge, 12% jyldyq stavka) boıynsha: jańa úıde - 86 myń teńge, bul 42 myń teńge degen qoljetimdi lımıtten 2 ese artyq. Osyndaı shartpen qaıtalama naryqta - 63 myń teńge qurasa, bul lımıtten 1,5 ese artyq. Sonymen, aıyna naqty 100 myń teńgege deıin tabysy bar otbasy úshin óz betimen turǵyn úı satyp alý úlken problema bolyp otyr. Bul halyqtyń ekonomıkalyq jaǵynan belsendi 8 mıllıon adamnyń 6 mıllıonyn quraıdy», - dedi S. Nokın. Onyń aıtýynsha, sondyqtan da halyqtyń osy atalǵan tobyn turǵyn úımen qamtamasyz etý úshin jaǵdaı jasaý jáne sharalar qabyldaý Úkimettiń taıaý aradaǵy negizgi mindetterine jatady.
